കോഴിക്കോട്: നഗരത്തിൽ ഓടിക്കൊണ്ടിരുന്ന സ്വകാര്യ ബസിന് തീപിടിച്ചു. കോഴിക്കോട് മാങ്കാവ് കടുപ്പിനിയിലാണ് അപകടമുണ്ടായത്. കോഴിക്കോട് – പെരുമണ്ണ റൂട്ടിൽ സർവീസ് നടത്തുന്ന ‘ഗ്യാലക്സി’ ബസിനാണ് തീപിടിച്ചത്. ബസിൽ നിന്ന് പുക ഉയരുന്നത് ശ്രദ്ധയിൽപ്പെട്ട ഉടൻ യാത്രക്കാരെ പുറത്തിറക്കിയതിനാൽ വൻ ദുരന്തം ഒഴിവായി.
കംപ്രസ്ഡ് നാച്ചുറൽ ഗ്യാസ് ഉപയോഗിച്ച് പ്രവർത്തിക്കുന്ന ബസിലാണ് തീപിടുത്തമുണ്ടായത്. ബസിന്റെ മുൻഭാഗത്ത് നിന്ന് പുക ഉയരുന്നത് കണ്ട ഡ്രൈവർ ഉടൻ തന്നെ വാഹനം നിർത്തുകയും യാത്രക്കാരോട് പുറത്തിറങ്ങാൻ നിർദ്ദേശിക്കുകയുമായിരുന്നു. യാത്രക്കാർ പുറത്തിറങ്ങിയതിന് പിന്നാലെ തീ പടരുകയായിരുന്നു. സിഎൻജി ഇന്ധനമായതിനാൽ തീ വേഗത്തിൽ പടരാൻ സാധ്യതയുണ്ടായിരുന്നെങ്കിലും അഗ്നിശമന സേനയും നാട്ടുകാരും ചേർന്ന് സ്ഥിതി നിയന്ത്രണവിധേയമാക്കി. യാന്ത്രിക തകരാറാണോ തീപിടുത്തത്തിന് കാരണമെന്ന് പരിശോധിച്ചുവരികയാണ്.
