കൊച്ചി: കേരള ഹൈക്കോടതിയിൽ മാധ്യമപ്രവർത്തകർക്കായി മീഡിയ റൂം (മീഡിയ ബ്രിഫിംഗ് സെന്റർ) അനുവദിക്കാനുള്ള നീക്കം ഉപേക്ഷിച്ചു. ഹൈക്കോടതി അഭിഭാഷക അസോസിയേഷന്റെ ഭാഗത്തുനിന്നുണ്ടായ കടുത്ത എതിർപ്പിനെത്തുടർന്നാണ് കോടതി ഭരണവിഭാഗം ഈ തീരുമാനമെടുത്തത്. മീഡിയ റൂം തുറക്കേണ്ടതില്ലെന്ന് അസോസിയേഷൻ ജനറൽ ബോഡി യോഗം ഏകകണ്ഠമായി തീരുമാനിക്കുകയായിരുന്നു.
ഹൈക്കോടതിയുടെ ഔദ്യോഗിക പരിപാടികൾ റിപ്പോർട്ട് ചെയ്യുന്നതിനും മാധ്യമപ്രവർത്തകർക്ക് കൃത്യമായ വിവരങ്ങൾ വേഗത്തിൽ കൈമാറുന്നതിനുമായാണ് ഒരു മീഡിയ ബ്രിഫിംഗ് സെന്റർ സ്ഥാപിക്കാൻ ഹൈക്കോടതി ഭരണവിഭാഗം പദ്ധതിയിട്ടിരുന്നത്. കോടതി നടപടികളുമായി ബന്ധപ്പെട്ട വാർത്തകൾ കൂടുതൽ കൃത്യതയോടെയും സുതാര്യമായും പൊതുജനങ്ങളിലേക്ക് എത്തിക്കാൻ ഈ സംവിധാനം ഉപകരിക്കുമെന്ന് അധികൃതർ വിലയിരുത്തിയിരുന്നു.
പദ്ധതിയുമായി ബന്ധപ്പെട്ട് ഹൈക്കോടതി അധികൃതർ അഭിഭാഷക അസോസിയേഷന്റെ അഭിപ്രായം തേടിയിരുന്നു. എന്നാൽ, വിഷയത്തിൽ അസോസിയേഷൻ കടുത്ത വിയോജിപ്പാണ് രേഖപ്പെടുത്തിയത്. നേരത്തെയും കോടതിയും മാധ്യമങ്ങളും തമ്മിലുണ്ടായ ചില തർക്കങ്ങളുടെ പശ്ചാത്തലത്തിൽ ഈ വിഷയം സങ്കീർണ്ണമായിരുന്നു. അസോസിയേഷൻ ഭരണസമിതി എടുത്ത തീരുമാനം ഹൈക്കോടതി അധികൃതരെ ഔദ്യോഗികമായി അറിയിച്ചതോടെയാണ് നിലവിൽ ഈ നീക്കത്തിൽ നിന്ന് പിന്മാറാൻ ഭരണവിഭാഗം തീരുമാനിച്ചത്. മാധ്യമപ്രവർത്തകർക്ക് കോടതി നടപടികൾ റിപ്പോർട്ട് ചെയ്യാൻ പ്രത്യേക സൗകര്യം ഒരുക്കണമെന്ന വർഷങ്ങളായുള്ള ആവശ്യത്തിനാണ് ഇതോടെ വീണ്ടും തിരിച്ചടിയേറ്റത്.
