മൂന്നാറില് കാട്ടാന ആക്രമണം. ദേവികുളത്ത് ഓടിക്കൊണ്ടിരുന്ന കാര് കാട്ടാന കുത്തിമറിച്ചു. ഓടിക്കൊണ്ടിരുന്ന കാറിന് നേരെ കാട്ടാന പാഞ്ഞടുക്കുകയായിരുന്നു. തലകീഴായി മറിഞ്ഞ കാറില് നിന്ന് സഞ്ചാരികള് അത്ഭുതകരമായി രക്ഷപ്പെട്ടു. സിഗ്നല് പോയിന്റില് വെച്ച് കാര് കാട്ടാനയുടെ മുന്പില് പെടുകയായിരുന്നു. വാഹനം വെട്ടിച്ച് മാറ്റി തിരിച്ചുപോകാനുള്ള ശ്രമത്തിനിടെയാണ് ആക്രമണം ഉണ്ടായത്. സമീപത്തുണ്ടായിരുന്നവര് എത്തി കാര് ഉയര്ത്തിയാണ് ഉള്ളില് ഉണ്ടായിരുന്നവരെ പുറത്തെടുത്തത്. സമീപത്ത് മേഞ്ഞിരുന്ന പശുവിനെ കാട്ടാന ആക്രമിച്ച് കൊന്നു. ആര് ആര് ടി ആനയെ തുരത്തി. ദേവികുളം സിഗ്നല് പോയിന്റിന് സമീപത്ത് വെച്ചായിരുന്നു ആക്രമണം ഉണ്ടാകുന്നത്.
കാര് ആക്രമിച്ചതിന് പിന്നാലെയാണ് സമീപത്തുണ്ടായിരുന്ന പശുവിനെ ചവിട്ടിക്കൊന്നത്. മേഖലയില് കണ്ട് പരിചയമില്ലാത്ത ആനയാണ് ആക്രമണം നടത്തിയത്. കാറില് ഉണ്ടായിരുന്നത് ലിവര്പൂളില് നിന്നെത്തിയ നാല് സഞ്ചാരികളാണ്. ഇവര് അത്ഭുതകരമായി കാട്ടാന ആക്രമണത്തില് നിന്ന് രക്ഷപ്പെടുകയായിരുന്നു. ആന എവിടെ നിന്നാണ് വന്നതെന്ന് വനംവകുപ്പ് ഉദ്യോഗസ്ഥര്ക്ക് വ്യക്തതയില്ല. ഇനിയും ആക്രമണം ഉണ്ടാകാന് സാധ്യതയുള്ളതിനാല് നിരീക്ഷിക്കേണ്ടത് അനിവാര്യമാണെന്നും ഇത് അടിയന്തരമായിട്ടുണ്ടാകുമെന്നും വനം വകുപ്പ് അറിയിച്ചു.
