തൃശ്ശൂര്: യുട്യൂബറായ മണവാളനെതിരെ തൃശ്ശൂര് പൊലീസ് ലുക്ക് ഔട്ട് സര്ക്കുലര് പുറത്തിറക്കി. കോളേജ് വിദ്യാര്ത്ഥികളെ കാറിടിച്ചു കൊലപ്പെടുത്താന് ശ്രമിച്ച കേസിലാണ് മുഹമ്മദ് ഷഹീന് ഷാ എന്ന മണവാളനെതിരായ നടപടി. സംഭവത്തിന് ശേഷം ഒളിവില് പോയ ഇയാളെ പൊലീസിന് കണ്ടെത്താന് സാധിച്ചില്ല.
ഏപ്രില് 19നാണ് കേസിന് ആസ്പദമായ സംഭവം ഉണ്ടായത്. തൃശ്ശൂര് കേരളവര്മ്മ കോളേജ് റോഡില് വച്ച് മോട്ടോര് സൈക്കിളില് യാത്ര ചെയ്യുകയായിരുന്ന രണ്ട് കോളേജ് വിദ്യാര്ത്ഥികളെ കാറിടിച്ചു കൊലപ്പെടുത്താന് മുഹമ്മദ് ഷഹീന് ഷാ ശ്രമിച്ചുവെന്നാണ് കേസ്. പൊലീസ് ഇപ്പോള് ഈ സംഭവത്തിലാണ് തുടര് നടപടികള് സ്വീകരിച്ചിരിക്കുന്നത്. ഇയാളെ കണ്ടെത്താനായി തൃശ്ശൂര് വെസ്റ്റ് പൊലീസ് ലുക്ക് ഔട്ട് സര്ക്കുലര് പുറപ്പെടുവിച്ചു.
