‘കോക്രോച്ച് ജനതാ പാർട്ടി’ എന്ന ഡിജിറ്റൽ പ്രസ്ഥാനത്തെക്കുറിച്ചുള്ള രാഷ്ട്രീയ ചർച്ചകൾ ഒരുവശത്ത് സജീവമാകുമ്പോൾ, വാർത്തകളിൽ നിറയുന്നത് പാറ്റകൾ എന്ന ജീവിവർഗമാണ്. സുപ്രീം കോടതി ചീഫ് ജസ്റ്റിസ് സൂര്യകാന്ത് യുവാക്കളെ പാറ്റകളോട് ഉപമിച്ചതിൽ പ്രതിഷേധിച്ച് ഉയർന്നുവന്നതാണ് ഈ ആക്ഷേപഹാസ്യ മുന്നണി. എന്നാൽ ശാസ്ത്രലോകത്തെ എന്നും അത്ഭുതപ്പെടുത്തുന്ന ഒന്നാണ് പാറ്റകളുടെ അതിജീവന ശേഷി. ദിനോസറുകൾക്ക് പോലും വംശനാശം സംഭവിച്ച ഭൂമിയിൽ 300 ദശലക്ഷം വർഷങ്ങളായി പാറ്റകൾ എങ്ങനെ നിലനിൽക്കുന്നു? നോക്കാം ഒരു പ്രത്യേക റിപ്പോർട്ട്.
കണ്ടാൽ നിസ്സാരമെന്ന് തോന്നുമെങ്കിലും ഭൂമിയിലെ ഏറ്റവും കഠിനമായ സാഹചര്യങ്ങളെപ്പോലും അതിജീവിച്ച ചരിത്രമാണ് പാറ്റകൾക്കുള്ളത്. ഏകദേശം 300 ദശലക്ഷം വർഷങ്ങളായി ഈ ജീവിവർഗം ഭൂമിയിലുണ്ടെന്നാണ് ശാസ്ത്രജ്ഞർ കണക്കാക്കുന്നത്. ഭൂമിയിലുണ്ടായ വൻ പാരിസ്ഥിതിക ദുരന്തങ്ങളെയും ആണവ വികിരണങ്ങളെപ്പോലും അതിജീവിക്കാൻ ഇവയ്ക്ക് കഴിയും. കീടനാശിനികൾക്കും രാസവസ്തുക്കൾക്കുമെതിരെ വളരെ വേഗത്തിൽ പ്രതിരോധശേഷി ആർജിക്കാൻ ഇവയ്ക്ക് പ്രത്യേക കഴിവുണ്ട്.
അതിശയകരമായ അതിജീവന ശേഷി:
- ഭക്ഷണമില്ലാതെ ഒരു മാസവും വെള്ളമില്ലാതെ രണ്ടാഴ്ചയും ജീവിക്കും.
- കടലാസ്, പശ, തുകൽ, മുടി എന്നിവ വരെ ദഹിപ്പിക്കാൻ ശേഷിയുള്ള സർവ്വഭുക്കുകൾ.
- വെള്ളത്തിനടിയിൽ 40 മിനിറ്റ് വരെ ശ്വാസം പിടിച്ചുനിർത്താൻ കഴിയും.
പാറ്റകളെ സംബന്ധിച്ചുള്ള ഏറ്റവും അത്ഭുതകരമായ കാര്യം, തല മുറിച്ചുമാറ്റിയാലും അവയ്ക്ക് ഒരു ആഴ്ചയോളം ജീവിക്കാൻ കഴിയും എന്നതാണ്! മനുഷ്യനടക്കമുള്ള ജീവികൾ തലയറ്റാൽ ഉടൻ മരിക്കുമ്പോൾ പാറ്റകൾക്ക് അത് ബാധകമല്ല. കാരണം, ഇവ ശ്വസിക്കാൻ വായയോ മൂക്കോ ഉപയോഗിക്കുന്നില്ല. പകരം ശരീരം മുഴുവൻ കാണപ്പെടുന്ന ‘സ്പൈറക്കിൾസ്’ (Spiracles) എന്നറിയപ്പെടുന്ന ചെറിയ ദ്വാരങ്ങളിലൂടെയാണ് വായു ശരീരത്തിലെത്തിക്കുന്നത്. തലയില്ലാതെ ജീവിക്കുന്ന പാറ്റകൾ ഒടുവിൽ മരിക്കുന്നത് ശ്വാസം മുട്ടിയല്ല, മറിച്ച് ഭക്ഷണം കഴിക്കാനാകാതെ വിശപ്പും ദാഹവും മൂലമാണ്.
തണുത്ത രക്തമുള്ള ജീവികളായതിനാൽ ശരീര താപനില നിലനിർത്താൻ ഇവയ്ക്ക് വലിയ തോതിൽ ഊർജ്ജമോ ഇടയ്ക്കിടെയുള്ള ഭക്ഷണമോ ആവശ്യമില്ല. ലോകമെമ്പാടും ഇവ ഇത്രവേഗം വ്യാപിക്കാൻ കാരണം ഇവയുടെ ഉയർന്ന പ്രത്യുൽപാദന ശേഷിയാണ്. വെറും 28 ദിവസത്തിനുള്ളിൽ പാറ്റകളുടെ മുട്ടകൾ വിരിയുകയും, ചുരുങ്ങിയ കാലയളവിനുള്ളിൽ കുഞ്ഞുങ്ങൾ വളർന്ന് പ്രത്യുൽപാദന ശേഷി കൈവരിക്കുകയും ചെയ്യും.
രാഷ്ട്രീയ പ്രസ്താവനകളിൽ പാറ്റകൾ ഉപമയാകുമ്പോഴും, ശാസ്ത്രലോകത്തെ വിസ്മയിപ്പിക്കുന്ന പ്രകൃതിയുടെ ഏറ്റവും കരുത്തരായ അതിജീവന പോരാളികളാണ് ഈ പ്രാണികൾ എന്നതിൽ സംശയമില്ല.
