എടക്കര: ക്രിസ്മസ് -പുതുവത്സര ആഘോഷത്തിന് ഊട്ടിയിലേക്കെത്തുന്ന സഞ്ചാരികളുടെ തിരക്കിനിടയില് ഇ-പാസ് പരിശോധനയും കൂടി ആയതോടെ നാടുകാണി ചുരത്തില് മണിക്കൂറുകളുടെ ഗതാഗതതടസ്സം. കെഎസ്ആര്ടിസി ബസുകള് ഉള്പ്പെടെയുള്ള വാഹനങ്ങളിലെ നൂറുകണക്കിനു യാത്രക്കാര് ദുരിതത്തിലായി. ഇന്നലെ രാവിലെ 6.30 മുതല് 11.30 വരെയാണ് ചുരത്തില് ഗതാഗതക്കുരുക്കുണ്ടായത്.
നാടുകാണി ടോള് ചെക്പോസ്റ്റിലാണ് ഇ-പാസ് പരിശോധിക്കുന്നത്. വാഹനങ്ങള് ഏറെയും ഇപാസില്ലാതെയാണ് എത്തുന്നത്. ഇതിനാല് ചെക്പോസ്റ്റിലെ ജീവനക്കാര് തന്നെ പാസ് എടുത്തുനല്കുകയാണ്. ഇതിനു സമയമെടുക്കുന്നുണ്ട്. ഇതാണ് ഗതാഗത തടസ്സത്തിനു പ്രധാന കാരണമായത്.
ടൂറിസ്റ്റ് ബസുകള് താഴെ നാടുകാണി മോട്ടര് വാഹന വകുപ്പ് ചെക്പോസ്റ്റിലും പരിശോധനയ്ക്ക് നിര്ത്തിയിടേണ്ടിവരുന്നതും ഗതാഗതം മുടക്കുന്നുണ്ട്. ഇ-പാസ് പരിശോധന ആഘോഷ വേളകളില് നിര്ത്തിവയ്ക്കണമെന്ന് നീലഗിരിയിലെ വ്യാപാരികളും വിവിധ സംഘടനകളും ആവശ്യപ്പെട്ടു. എന്നാല്, മദ്രാസ് ഹൈക്കോടതിയുടെ നിര്ദേശപ്രകാരമാണ് നടപടി എന്നാണ് അധികൃതര് വ്യക്തമാകുന്നത്. ഇനിയുള്ള ദിവസങ്ങളില് തിരക്ക് വര്ധിക്കുമെന്നതിനാല് ഗതാഗതം കൂടുതല് തടസ്സപ്പെടാനിടയുണ്ട്.
