കൊയിലാണ്ടി: കോഴിക്കോട് കൊയിലാണ്ടിയില് യുവാവിനെ ബന്ദിയാക്കി പണം കവര്ന്ന സംഭവത്തില് പൊലീസ് കേസെടുത്തു. ജീവനക്കാരനെ രണ്ട് സ്ത്രീകളാണ് ആക്രമിച്ചതെന്ന് എഫ്ഐആര്. കണ്ണില് മുളകുപൊടി വിതറിയ ശേഷം എഴുപത്തി രണ്ട് ലക്ഷത്തി നാല്പതിനായിരം രൂപ കവര്ന്നു എന്നാണ് യുവാവിന്റെ പരാതി.
ഇന്നലെ ATM കൗണ്ടറുകളില് പണം നിറക്കാന് പോകുന്നതിനിടെ കുരുടിമുക്കില് വച്ചാണ് യുവാവിന്റെ കണ്ണില് മുളകുപൊടി വിതറി ബന്ദിയാക്കിയ ശേഷം പണം കവര്ന്നത്. 25 ലക്ഷം രൂപയാണ് ആദ്യം നഷ്ടമായത്് പറഞ്ഞിരുന്നുവെങ്കിലും 72, 40, 000 രൂപ നഷ്ടപ്പെട്ടു എന്നാണ് എഫ്ഐആറില്.പയ്യോളി സ്വദേശി സുഹൈലിന്റെ പരാതിയില് പ്രാഥമിക അന്വേഷണം നടത്തിയ ശേഷമാണ് രണ്ടുപേര്ക്കെതിരെ കേസെടുത്തത്. പര്ദ്ദ ധരിച്ച രണ്ടുപേരില് ഒരാള് യാത്രയ്ക്കിടെ വണ്ടിയുടെ മുന്നിലേക്ക് വീണു എന്നും വാഹനം നിര്ത്തിയപ്പോള് മറ്റൊരു സ്ത്രീ ആക്രമിക്കുകയായിരുന്നു എന്നുമാണ് എഫ്ഐആറില് പറയുന്നത്. ഫോറന്സിക് സംഘവും, വിരല് അടയാള വിദഗ്ധരും പണം തട്ടിയ സ്ഥലത്തും യുവാവിനെ ഉപേക്ഷിച്ച സ്ഥലത്തും പരിശോധന നടത്തി. യുവാവിന്റെ മൊഴിയില് വൈരുദ്ധ്യം ഉള്ളതിനാല് കേസിലെ ദുരൂഹത കേന്ദ്രീകരിച്ചും അന്വേഷണം നടക്കുന്നുണ്ട്.
