മലപ്പുറം: അരീക്കോട് ആശുപത്രിയില്‍ രോഗിയുടെ മുറിയില്‍ നിന്നും 50000 രൂപ മോഷ്ടിച്ച ആള്‍ പിടിയില്‍. പെരിന്തല്‍മണ്ണ പട്ടിക്കാട് സ്വദേശി അബ്ബാസ് (58) ആണ് പിടിയിലായത്. തിങ്കളാഴ്ച്ചയാണ് കിടത്തി ചികിത്സ തേടിയ രോഗിയുടെ പണവുമായി അബ്ബാസ് കടന്നു കളഞ്ഞത്. സമാനമായ നിരവധി മോഷണ കേസുകളില്‍ പ്രതിയാണ് പിടിയിലായ അബ്ബാസെന്ന് പൊലീസ് പറഞ്ഞു.
അരീക്കോടിനടുത്ത് കടുങ്ങല്ലൂരിലെ സ്വകാര്യ ആശുപത്രിയില്‍ കഴിഞ്ഞ ദിവസമാണ് മോഷണമുണ്ടായത്. സ്‌കാനിംഗിനായി രോഗിയെ കൊണ്ടുപോയതിന് പിന്നാലെയാണ് മുറിയില്‍ കവര്‍ച്ച നടന്നത്. രോഗിയെ ഡിസ്ചാര്‍ജ് ചെയ്യുമ്പോള്‍ ആശുപത്രിയില്‍ അടക്കാന്‍ കരുതി വച്ച പണമാണ് കവര്‍ന്നത്. അന്ന് അബ്ബാസിന്റെ സിസിടിവി ദ്യശ്യങ്ങള്‍ സഹിതമാണ് രോഗിയുടെ ബന്ധുക്കള്‍ അരീക്കോട് പൊലീസില്‍ പരാതി നല്‍കിയിരുന്നത്. മുറിയില്‍ നിന്നും ഇയാള്‍ ഇറങ്ങുന്നത് ബന്ധുക്കള്‍ കണ്ടിരുന്നു. എന്തിനാണ് മുറിയില്‍ കയറിയതെന്ന ചോദ്യത്തിന് മുറി മാറിപ്പോയതാണെന്നായിരുന്നു പ്രതിയുടെ മറുപടി.
