തിരുവമ്പാടി : തിരുവമ്പാടി എസ്റ്റേറ്റില്‍ ജീര്‍ണിച്ചനിലയില്‍ അജ്ഞാത മൃതശരീരം കണ്ടെത്തിയതുമായി ബന്ധപ്പെട്ട് തിരുവമ്പാടി പോലീസ് ഊര്‍ജിതാന്വേഷണം തുടങ്ങി. കഴിഞ്ഞ ജനുവരിയില്‍ മുക്കം നീലേശ്വരത്തുനിന്ന് കാണാതായ യുവാവിനെ ചുറ്റിപ്പറ്റിയാണ് അന്വേഷണം.മൃതദേഹം കണ്ടെത്തിയ സ്ഥലപരിസരവുമായി ഈ യുവാവിനുള്ള ബന്ധം കണക്കിലെടുത്താണിത്. യുവാവിനെ കാണ്മാനില്ലെന്ന് ചൂണ്ടിക്കാട്ടി ബന്ധുക്കള്‍ നേരത്തേ മുക്കം പോലീസില്‍ പരാതി നല്‍കിയിരുന്നു.
താഴെ തിരുവമ്പാടി വാപ്പാട്ട് പേനക്കാവിനു സമീപം ശനിയാഴ്ച വൈകീട്ട് വിറകു ശേഖരിക്കാനെത്തിയ നാട്ടുകാരനാണ് ജീര്‍ണിച്ച മൃതശരീരം കണ്ടെത്തിയത്.
