തലശ്ശേരി: പി പി ദിവ്യയുടെ മുന്കൂര് ജാമ്യ ഹര്ജി തള്ളി. തലശ്ശേരി പ്രിന്സിപ്പല് സെഷന്സ് കോടതിയാണ് ജാമ്യാപേക്ഷ തള്ളിയത്. ആസൂത്രിതമായി ദിവ്യ യാത്രയയപ്പ് യോഗത്തിലെത്തി വ്യക്തിഹത്യ നടത്തിയെന്നും, പ്രേരണക്കുറ്റം നിലനില്ക്കുന്നുമെന്നുമായിരുന്നു പ്രാസിക്യൂഷന് വാദം. കേരള മനസാക്ഷിയെ പിടിച്ചുകുലുക്കിയ സംഭവമായിരുന്നു എഡിഎം കെ നവീന് ബാബുവിന്റെ ആത്മഹത്യ.
പ്രശാന്തന് വിജിലന്സിന് നല്കിയ പരാതി വ്യാജമാണെന്ന് നവീന് ബാബുവിന്റെ കുടുംബത്തിന്റെ അഭിഭാഷകന് കോടതിയില് ചൂണ്ടിക്കാട്ടിയിരുന്നു. നവീന് ബാബുവിനോട് കടുത്ത വൈരാഗ്യം ദിവ്യക്ക് ഉണ്ടായിരുന്നുവെന്നും കുടുംബം കോടതിയില് വാദിച്ചിരുന്നു.
ആത്മഹത്യ പ്രേരണയ്ക്ക് ജാമ്യമില്ലാ വകുപ്പ് ചുമത്തിയാണ് പി പി ദിവ്യക്ക് എതിരെ കേസെടുത്തിരുന്നത്. എന്നാല്, പോലീസ് ചോദ്യം ചെയ്യാനോ അറസ്റ്റ് രേഖപ്പെടുത്താനോ മെനക്കെട്ടില്ല. ആരോഗ്യവകുപ്പ് ടി വി പ്രശാന്തനെ സസ്പെന്റ് ചെയ്തു. കളക്ടര് ക്ഷണിച്ചതിനാലാണ് താന് എത്തിയതെന്ന് ജാമ്യാപേക്ഷയില് ദിവ്യ വ്യക്തമാക്കി.
നാട്ടിലേക്ക് ട്രാന്സ്ഫറായി മടങ്ങാനിരിക്കെയാണ് നവീനെ കണ്ണൂരെ താമസസ്ഥലത്ത് മരിച്ച നിലയില് കണ്ടെത്തുന്നത്. നവീന് ബാബുവിന് പത്തനംതിട്ടയിലേക്ക് ട്രാന്സ്ഫര് കിട്ടിയപ്പോള് സഹപ്രവര്ത്തകര് സംഘടിപ്പിച്ച യാത്രയയപ്പിലാണ് നവീനെ വേദിയിലിരുത്തി പി പി ദിവ്യ അഴിമതി ആരോപണം ഉന്നയിച്ചത്. ഒരു പെട്രോള് പമ്പ് അനുവദിക്കുന്നതുമായി ബന്ധപ്പെട്ട് നവീന് ബാബു അഴിമതി നടത്തിയെന്ന് പരോക്ഷമായി സൂചിപ്പിച്ചുകൊണ്ടായിരുന്നു പി പി ദിവ്യയുടെ വിമര്ശനം.
