തിരുവനന്തപുരം: സംസ്ഥാനത്ത് വൈദ്യുതി പ്രതിസന്ധി വീണ്ടും രൂക്ഷമാകുന്നു. മധ്യപ്രദേശിൽ നിന്നുള്ള 200 മെഗാവാട്ട് വൈദ്യുതി ലഭിക്കാതായതിനെ തുടർന്ന് ഇന്നലെ സംസ്ഥാനത്ത് വൈദ്യുതി നിയന്ത്രണം ഏർപ്പെടുത്തി.
കഴിഞ്ഞ ദിവസം പീക്ക് അവറിൽ മാത്രം 800 മെഗാവാട്ടിന്റെ കുറവാണ് നേരിട്ടത്. രാത്രി ഒൻപത് മണിക്ക് ശേഷവും ആവശ്യമായ വൈദ്യുതി ലഭ്യമാകാത്തതിനെ തുടർന്ന് പലയിടങ്ങളിലും ഒന്നിലേറെ തവണ വൈദ്യുതി മുടങ്ങി.
മാറ്റക്കരാർ അടിസ്ഥാനത്തിലുള്ള വൈദ്യുതി ലഭ്യമായില്ലെങ്കിൽ ഇന്നും സംസ്ഥാനത്ത് നിയന്ത്രണം ഉണ്ടായേക്കുമെന്നാണ് സൂചന. 300 മെഗാവാട്ടിന്റെ കടംകൊടുക്കൽ അവസാനിച്ചതോടെ പ്രതിസന്ധി കുറയുമെന്നായിരുന്നു നേരത്തെയുള്ള വിലയിരുത്തൽ. എന്നാൽ കഴിഞ്ഞ ദിവസത്തെ വൈദ്യുതി നിയന്ത്രണം പ്രതിസന്ധി തുടരുന്നതിന്റെ സൂചനയായി.
ചൂട് വർധിച്ചതും മഴ ലഭിക്കാത്തതും വൈദ്യുതി ഉപഭോഗം ഉയർന്നുതന്നെ നിൽക്കാൻ കാരണമായി. അതേസമയം, സംസ്ഥാനത്തെ ആഭ്യന്തര വൈദ്യുതി ഉൽപ്പാദനത്തിലും വലിയ കുറവുണ്ടായിട്ടുണ്ട്.
ഉത്തരേന്ത്യൻ സംസ്ഥാനങ്ങളിലെ ഉന്നത ഉദ്യോഗസ്ഥരുമായി നേരിട്ട് ചർച്ചകൾ നടത്തിയിട്ടും പ്രതിസന്ധിക്ക് പരിഹാരമായിട്ടില്ലെന്നാണ് നിലവിലെ സാഹചര്യം. ഇതിനിടെ, വൈദ്യുതി പ്രതിസന്ധിയിൽ ജനങ്ങൾ വലയുമ്പോൾ സർക്കാർ ആവശ്യമായ ഇടപെടൽ നടത്തുന്നില്ലെന്ന വിമർശനവുമായി പ്രതിപക്ഷ പാർട്ടികൾ രംഗത്തെത്തി.
