മലപ്പുറം: രാജ്യസഭയിലേക്കുള്ള മുസ്ലിം ലീഗ് സ്ഥാനാര്ഥിയെ പാര്ട്ടി ചര്ച്ച ചെയ്തു തീരുമാനിക്കുമെന്ന് പി.കെ കുഞ്ഞാലിക്കുട്ടി. താന് സ്ഥാനാര്ഥിയാവാനില്ലെന്നും അദ്ദേഹം വ്യക്തമാക്കി. പാര്ട്ടി സ്ഥാനാര്ഥി ചര്ച്ചയിലേക്ക് കടന്നിട്ടില്ല. മാധ്യമങ്ങളാണ് ചര്ച്ച തുടങ്ങിയത്. സാദിഖലി തങ്ങളാണ് വിഷയത്തില് അന്തിമ തീരുമാനമെടുക്കേണ്ടത്. അതില് പ്രതികരിക്കാന് തനിക്ക് അവകാശമില്ലാത്തതുകൊണ്ടാണ് ഇതുവരെ പ്രതികരിക്കാതിരുന്നത്. തങ്ങളോട് പ്രത്യേക അനുമതി വാങ്ങിയ ശേഷമാണ് ഇപ്പോള് നിലപാട് വ്യക്തമാക്കുന്നതെന്നും കുഞ്ഞാലിക്കുട്ടി പറഞ്ഞു.
രാഹുല് ഗാന്ധി റായ്ബറേലിയില് ജയിച്ചാല് വയനാടിന് ലീഗ് അവകാശവാദമുന്നയിക്കില്ലെന്നും കുഞ്ഞാലിക്കുട്ടി വ്യക്തമാക്കി. ലീഗിന് രാജ്യസഭാ സീറ്റ് എന്നത് നേരത്തെ ചര്ച്ച ചെയ്തു തീരുമാനിച്ചതാണ്. അത് ഇനി മാറ്റേണ്ടതില്ലെന്നും അദ്ദേഹം വ്യക്തമാക്കി.
