വിഷു എന്ന് കേൾക്കുമ്പോൾ തന്നെ മലയാളി മനസ്സിൽ ആദ്യം ഓടിയെത്തുന്നത് തൂശനിലയിൽ വിളമ്പുന്ന വിഭവസമൃദ്ധമായ സദ്യയുടെ ചിത്രമാണ്. എന്നാൽ സദ്യ വെറുമൊരു സ്വാദ് മാത്രമല്ല, ശരീരത്തിന് ആവശ്യമായ സകല പോഷകങ്ങളും അടങ്ങിയ ഒരു സമ്പൂർണ്ണ ഭക്ഷണമാണെന്നതാണ് വാസ്തവം.
പന്ത്രണ്ടിലധികം വിഭവങ്ങൾ ചേരുന്ന സദ്യ പച്ചക്കറികളുടെയും പ്രോട്ടീന്റെയും കലവറയാണ്. അവിയൽ, സാമ്പാർ, തോരൻ എന്നിവയിൽ അടങ്ങിയിരിക്കുന്ന വിറ്റാമിനുകളും മിനറലുകളും ശരീരത്തിന്റെ സ്വാഭാവിക വളർച്ചയ്ക്ക് അത്യാവശ്യമാണ്. ഇതിലെ നാരുകൾ അഥവാ ഫൈബർ ദഹനം സുഗമമാക്കാനും മലബന്ധം ഒഴിവാക്കാനും സഹായിക്കുന്നു.
സദ്യയിലെ പ്രധാനിയായ ഇഞ്ചിക്കറി ദഹനപ്രശ്നങ്ങൾക്കുള്ള ഉത്തമ പരിഹാരമാണ്. ഇഞ്ചിയിലെ ‘ജിഞ്ചറോൾ’ എന്ന ഘടകം ഓക്സിഡേറ്റീവ് സ്ട്രെസ് കുറയ്ക്കാൻ സഹായിക്കുന്നു. മോരും പുളിശ്ശേരിയും പേശികളുടെ ആരോഗ്യത്തിന് ആവശ്യമായ പ്രോട്ടീൻ നൽകുന്നു. മോരിലുള്ള ഗുണകരമായ ബാക്ടീരിയകൾ കുടലിന്റെ ആരോഗ്യം സംരക്ഷിക്കുന്നവയാണ്. നാരങ്ങ, മാങ്ങ അച്ചാറുകൾ വിറ്റാമിൻ സിയുടെ മികച്ച സ്രോതസ്സുകളാണ്.
സദ്യയ്ക്ക് തുടക്കം കുറിക്കുന്ന നെയ്യിൽ ഒമേഗ 3 ഫാറ്റി ആസിഡുകളും വിറ്റാമിൻ എയും അടങ്ങിയിരിക്കുന്നു. ഇത് ചർമ്മത്തിന്റെ തിളക്കത്തിനും കുടലിന്റെ ആരോഗ്യത്തിനും ഗുണകരമാണ്. ഇനി പായസത്തിന്റെ കാര്യമെടുത്താൽ, ശർക്കര ഉപയോഗിച്ച് തയ്യാറാക്കുന്ന പായസം ഇരുമ്പ്, സിങ്ക്, പൊട്ടാസ്യം എന്നീ മൂലകങ്ങളാൽ സമ്പന്നമാണ്.
ചുരുക്കത്തിൽ, മിതമായി കഴിച്ചാൽ വിഷുസദ്യ വെറുമൊരു ആഘോഷം മാത്രമല്ല, നമ്മുടെ ആരോഗ്യത്തിന് ലഭിക്കുന്ന ഒരു വലിയ മുതൽക്കൂട്ട് കൂടിയാണ്. രുചിയോടെയും ഒപ്പം ആരോഗ്യബോധത്തോടെയും ഈ വിഷുസദ്യ നമുക്ക് ആസ്വദിക്കാം.
