സംസ്ഥാനത്ത് ഷിഗെല്ല ആശങ്കകൾ നിലനിൽക്കുന്നതിനിടെ, പനി ബാധിതരുടെ എണ്ണത്തിലും വൻ വർദ്ധനവ്. ഇന്നലെ മാത്രം പതിനായിരത്തിലധികം ആളുകളാണ് പനി ബാധിച്ച് വിവിധ ആശുപത്രികളിൽ ചികിത്സ തേടിയത്. മലപ്പുറം ജില്ലയിലാണ് പനിബാധിതർ ഏറ്റവും കൂടുതലുള്ളത്. പനിക്ക് പുറമെ ഡെങ്കിപ്പനി, ചിക്കൻപോക്സ്, അമീബിക് മസ്തിഷ്ക ജ്വരം, ഷിഗെല്ല എന്നിവയും സംസ്ഥാനത്ത് പടർന്നുപിടിക്കുകയാണ്. ഇന്നലെ സംസ്ഥാനത്ത് ഒരു ഡെങ്കിപ്പനി മരണവും റിപ്പോർട്ട് ചെയ്തിട്ടുണ്ട്.
സംസ്ഥാനത്ത് പകർച്ചവ്യാധികൾ പിടിമുറുക്കുന്നതിന്റെ ഞെട്ടിക്കുന്ന കണക്കുകളാണ് ഇപ്പോൾ പുറത്തുവരുന്നത്. ഇന്നലെ മാത്രം 10,853 പേരാണ് പനി ബാധിച്ച് ആശുപത്രികളിൽ എത്തിയത്. 2,117 പേർ ചികിത്സ തേടിയ മലപ്പുറം ജില്ലയാണ് പട്ടികയിൽ മുന്നിൽ. തൃശ്ശൂരിൽ ആയിരത്തി അറുപത്തിരണ്ടും (1,062), പാലക്കാട് 970-ഉം, കോഴിക്കോട് 862-ഉം പേർ ഇന്നലെ ചികിത്സ തേടി. തിരുവനന്തപുരം, കാസർഗോഡ്, എറണാകുളം, കണ്ണൂർ ജില്ലകളിലും രോഗബാധിതരുടെ എണ്ണം ഉയർന്ന നിലയിലാണ്.
ഡെങ്കിപ്പനി വ്യാപനവും മരണങ്ങളും സംസ്ഥാനത്ത് കനത്ത ഭീഷണിയാകുന്നുണ്ട്. ഇന്നലെ മാത്രം 11 പേർക്ക് ഡെങ്കിപ്പനി സ്ഥിരീകരിക്കുകയും ഒരു മരണം റിപ്പോർട്ട് ചെയ്യുകയും ചെയ്തു. ഈ മാസം ഇതുവരെ രണ്ട് മരണങ്ങളാണ് ഡെങ്കിപ്പനി മൂലം സംഭവിച്ചത്. ആറുമാസത്തിനിടെ 2,796 പേർക്ക് രോഗം ബാധിച്ചപ്പോൾ 15 പേർക്ക് ജീവൻ നഷ്ടമായിക്കഴിഞ്ഞു. കൂടാതെ 109 പേർക്ക് ചിക്കൻപോക്സും, കൊല്ലം, പത്തനംതിട്ട ജില്ലകളിലായി രണ്ടുപേർക്ക് മലേറിയയും ഇന്നലെ സ്ഥിരീകരിച്ചു. കഴിഞ്ഞ ആറുമാസത്തിനിടെ അമീബിക് മസ്തിഷ്ക ജ്വരം ബാധിച്ചവരുടെ എണ്ണം 132 ആയി ഉയർന്നു.
മറ്റൊരു പ്രധാന ആശങ്ക ഷിഗെല്ല വ്യാപനമാണ്. ഇന്നലെ വയനാട്, മലപ്പുറം, കോഴിക്കോട്, കണ്ണൂർ ജില്ലകളിലായി എട്ട് പേർക്കാണ് ഷിഗെല്ല സ്ഥിരീകരിച്ചത്. ഈ വർഷം ഇതുവരെ 93 പേർക്ക് രോഗം ബാധിച്ചപ്പോൾ ഈ മാസം മാത്രം 18 പേർ രോഗികളായി. ഷിഗെല്ല മൂലം ഈ മാസം ഒരു മരണവും ആറുമാസത്തിനിടെ രണ്ട് മരണങ്ങളും റിപ്പോർട്ട് ചെയ്തിട്ടുണ്ട്. നിലവിൽ എഴുപതോളം പേർ ഷിഗെല്ല ലക്ഷണങ്ങളോടെ നിരീക്ഷണത്തിലാണ്.
പകർച്ചവ്യാധികൾ അതിവേഗം പടരുന്ന സാഹചര്യത്തിൽ സ്വയംചികിത്സ ഒഴിവാക്കണമെന്നും, പരിസര ശുചിത്വം പാലിക്കാൻ പൊതുജനങ്ങൾ പ്രത്യേകം ശ്രദ്ധിക്കണമെന്നും ആരോഗ്യവകുപ്പ് കർശന നിർദ്ദേശം നൽകിയിട്ടുണ്ട്.
