പത്തനംതിട്ട കടമ്മനിട്ടയിൽ വീട്ടുലിഫ്റ്റിൽ തല കുടുങ്ങി വയോധികൻ മരിച്ചു. കടമ്മനിട്ട കല്ലേലിമുക്ക് സ്വദേശിയായ മാത്തുക്കുട്ടി (75) ആണ് ദാരുണമായി മരണപ്പെട്ടത്. ഇന്ന് രാവിലെയോടെയായിരുന്നു നാടിനെ നടുക്കിയ ഈ സംഭവം നടന്നത്. ശാരീരിക പരിമിതിയുള്ള വ്യക്തിയായിരുന്നു മരണപ്പെട്ട മാത്തുക്കുട്ടി. വീട്ടിൽ നിന്നും റോഡിലേക്ക് ഇറങ്ങുന്നതിന് ബുദ്ധിമുട്ടായതിനെ തുടർന്നാണ് വീടിന് മുന്നിലായി പ്രത്യേക ലിഫ്റ്റ് സ്ഥാപിച്ചിരുന്നത്. ഇന്ന് രാവിലെ ഈ ലിഫ്റ്റ് ഉപയോഗിക്കുന്നതിനിടെ അപ്രതീക്ഷിതമായി ഇദ്ദേഹത്തിന്റെ തല ലിഫ്റ്റിൽ കുടുങ്ങുകയായിരുന്നു.
അപകടവിവരമറിഞ്ഞ് ഫയർഫോഴ്സ് സംഘം ഉടനടി സ്ഥലത്തെത്തി ലിഫ്റ്റിൽ നിന്നും ഇദ്ദേഹത്തെ പുറത്തെടുത്തുവെങ്കിലും അപ്പോഴേക്കും ജീവൻ നഷ്ടമായിരുന്നു. മരണപ്പെട്ട മാത്തുക്കുട്ടിയും ഭാര്യയും മാത്രമായിരുന്നു ഈ വീട്ടിൽ താമസിച്ചിരുന്നത്. ശാരീരിക ബുദ്ധിമുട്ടുകളുള്ള മാത്തുക്കുട്ടിയുടെ എളുപ്പത്തിലുള്ള യാത്രയ്ക്കായി ഒരുക്കിയ സംവിധാനം തന്നെ ഒടുവിൽ ജീവനെടുത്തതിന്റെ നടുക്കത്തിലാണ് കുടുംബവും നാട്ടുകാരും. സംഭവത്തിൽ പൊലീസ് സ്ഥലത്തെത്തി മേൽനടപടികൾ സ്വീകരിച്ചു വരികയാണ്.
