തിരുവനന്തപുരം: കോഴിക്കോട്ട് വെച്ച് ആലപ്പുഴ- കണ്ണൂർ എക്സിക്ക്യൂട്ടീവ് ട്രെയിനിൽ ഉണ്ടായ അക്രമം അതീവ ദുഃഖകരവും ഞെട്ടിക്കുന്നതുമെന്ന് മുഖ്യമന്ത്രി പിണറായി വിജയൻ. പിഞ്ചു കുഞ്ഞടക്കം മൂന്ന് പേരുടെ ജീവനാണ് ആലപ്പുഴ കണ്ണൂര് എക്സിക്യൂട്ടീവ് എക്സ്പ്രസ്സില് ഉണ്ടായ ആക്രമണത്തില് പൊലിഞ്ഞത്. കമ്പാര്ട്മെന്റില് ഉണ്ടായ യാത്രക്കാര്ക്കും പൊള്ളലേറ്റിറ്റുണ്ട്. സംഭവത്തില് സമഗ്രമായ അന്വേഷണം നടത്താനും കുറ്റകൃത്യത്തിന്റെ മുഴുവന് വിവരങ്ങളും നിയമത്തിനു മുന്നില് കൊണ്ടുവരാനും പൊലീസിന് നിര്ദേശം നല്കിയിട്ടുണ്ടെന്നും മുഖ്യമന്ത്രി അറിയിച്ചു
അന്വേഷണത്തിനായി പ്രത്യേക സംഘം രൂപീകരിക്കും. അക്രമിയെ പിടികൂടാനുള്ള ശ്രമങ്ങള് പൊലീസ് ഊര്ജ്ജിതമായി നടത്തുകയാണ്. സംസ്ഥാന പൊലീസ് മേധാവി തന്നെ ഇതിന് മേല്നോട്ടം വഹിക്കുന്നുണ്ടെന്നും മുഖ്യമന്ത്രി പറഞ്ഞു. റെയില് യാത്രക്കാരുടെ സുരക്ഷ ഉറപ്പുവരുത്തുന്നതിന് സംസ്ഥാന സര്ക്കാര് ശക്തമായ നടപടികള് എടുക്കും. യാത്രാസുരക്ഷയുടെ കാര്യത്തില് സാധ്യമായ എല്ലാ നടപടികളും അടിയന്തര സ്വഭാവത്തോടെ സ്വീകരിക്കണമെന്ന് കേന്ദ്ര റെയില്വേ മന്ത്രാലയത്തോട് ആവശ്യപ്പെടും. മരണമടഞ്ഞവരുടെ കുടുംബാംഗങ്ങളുടെ ദുഃഖത്തില് പങ്കുചേരുന്നു. പരുക്കേറ്റവര്ക്ക് ആവശ്യമായ ചികിത്സ ഉറപ്പാക്കും എന്നും മുഖ്യമന്ത്രി പറഞ്ഞു.
സംഭവം ഞെട്ടിക്കുന്നതാണെന്ന് മന്ത്രി അഹമ്മദ് ദേവര്കോവിലും പ്രതികരിച്ചു. സിസിടിവി ദൃശ്യങ്ങള് കേന്ദ്രീകരിച്ചാണ് അന്വേഷണം നടക്കുന്നത്. പ്രതിക്ക് പൊള്ളല് ഏറ്റിട്ടുണ്ട്. കൂടുതല് തെളിവുകള് ലഭ്യമായിട്ടില്ല. ഏകദേശം 25 വയസ്സ് തോന്നിക്കുന്ന ആളാണ് അക്രമി എന്നാണു നിഗമനമെന്നും അഹമ്മദ് ദേവര്കോവില് പറഞ്ഞു.
