തിരുവനന്തപുരം: യാത്രയ്ക്കിടെ കൂടുതൽ പൊലീസ് വാഹനങ്ങൾ വിന്യസിച്ചതിൽ പൊലീസിനോട് അതൃപ്തി അറിയിച്ച് മുഖ്യമന്ത്രി വി.ഡി. സതീശൻ. തിരുവനന്തപുരം ഡിസിപിയോടാണ് മുഖ്യമന്ത്രി കടുത്ത അതൃപ്തി രേഖപ്പെടുത്തിയത്.
പൈലറ്റ് വാഹനങ്ങളുടെ എണ്ണം കൂട്ടരുതെന്ന് മുഖ്യമന്ത്രി പൊലീസിന് കർശന നിർദേശം നൽകി. അധികമായി വിന്യസിച്ച വാഹനങ്ങൾ പിന്നീട് തിരിച്ചയച്ചു.
മുഖ്യമന്ത്രിയായതിന് പിന്നാലെ മുൻകാലങ്ങളിലേതുപോലെ നിരവധി എസ്കോർട്ട്, പൈലറ്റ് വാഹനങ്ങൾ വേണ്ടെന്ന നിലപാട് വി.ഡി. സതീശൻ സ്വീകരിച്ചിരുന്നു. ഇതിന്റെ ഭാഗമായി യാത്രകളിൽ വാഹനങ്ങളുടെ എണ്ണം കുറച്ചാണ് സുരക്ഷാ ക്രമീകരണങ്ങൾ നടത്തിയിരുന്നത്.
എന്നാൽ മുഖ്യമന്ത്രിക്കും മന്ത്രിമാർക്കുമെതിരെ യുവമോർച്ച പ്രതിഷേധം ശക്തമാക്കുന്ന സാഹചര്യത്തിലാണ് സുരക്ഷ വർധിപ്പിക്കാൻ പൊലീസ് തീരുമാനിച്ചത്. ഇന്ന് പതിവിൽ നിന്ന് വ്യത്യസ്തമായി കൂടുതൽ അകമ്പടി വാഹനങ്ങളാണ് വിന്യസിച്ചത്.
തിരുവനന്തപുരം നഗരത്തിൽ മുഖ്യമന്ത്രി പ്രവേശിക്കുമ്പോൾ കരിങ്കൊടി പ്രതിഷേധം നടത്തുമെന്ന് യുവമോർച്ച പ്രഖ്യാപിച്ചിരുന്നു. ഇതിന് പിന്നാലെ ഇന്നലെ അർധരാത്രിക്ക് ശേഷം തിരുവനന്തപുരം വിമാനത്താവളത്തിൽ നിന്ന് ക്ലിഫ് ഹൗസിലേക്കുള്ള യാത്രയ്ക്കിടെ ചാക്കയിൽ വച്ച് മുഖ്യമന്ത്രിക്കെതിരെ യുവമോർച്ച പ്രവർത്തകർ കരിങ്കൊടി പ്രതിഷേധവും നടത്തിയിരുന്നു.
ഇന്നും കാര്യമായ പ്രതിഷേധത്തിന് സാധ്യതയുണ്ടെന്നാണ് ഇന്റലിജൻസ് മുന്നറിയിപ്പ്. ഇതിന്റെ പശ്ചാത്തലത്തിലാണ് പൊലീസ് സുരക്ഷ വർധിപ്പിച്ചത്. എന്നാൽ അധികമായി പൈലറ്റ് വാഹനങ്ങൾ വിന്യസിച്ചതിനെ മുഖ്യമന്ത്രി എതിർത്തതോടെ അവ പിന്നീട് പിൻവലിക്കുകയായിരുന്നു.
