കാണ്പൂര്: ഉത്തര്പ്രദേശില് പ്രായപൂര്ത്തിയാകാത്ത പെണ്കുട്ടിയെ വഴിയില് തടഞ്ഞ് നിര്ത്തി രണ്ട് പേര് ചേര്ന്ന് പീഡിപ്പിച്ചതായി പരാതി. 17 കാരിയായ പെണ്കുട്ടിക്ക് നേരെ ക്രൂര പീഡനം നടന്നത് പിലിഭിത്തിലാണ്. സംഭവത്തില് മാതാപിതാക്കളുടെ പരാതിയില് കേസെടുത്ത പൊലീസ് രണ്ട് യുവാക്കളെ കസ്റ്റഡിയിലെടുത്തിട്ടുണ്ട്. നവംബര് 23 ന് പെണ്കുട്ടി അമ്മയെ കാണാന് പോകുമ്പോഴാണ് സംഭവം നടന്നതെന്ന് പൊലീസ് പറഞ്ഞു. സംഭവത്തിന് പിന്നാലെ പെണ്കുട്ടി ആത്മഹത്യക്ക് ശ്രമിച്ചിരുന്നു.
പെണ്കുട്ടി വീട്ടില് നിന്നും അമ്മയെ കാണാന് ജോലി സ്ഥലത്തേക്ക് പോവുകയായിരുന്നു. പ്രതികളിലൊരാള് റോഡില് വെച്ച് പെണ്കുട്ടിയെ തടഞ്ഞ് നിര്ത്തി ആളൊഴിഞ്ഞ സ്ഥലത്തേക്ക് ബലമായി കൊണ്ടുപോയി. ഇയാള്ക്കൊപ്പം ഒരു സുഹൃത്തുമുണ്ടായിരുന്നു. പിന്നീട് പെണ്കുട്ടിയെ പ്രതികള് ലൈംഗികമായി പീഡിപ്പിച്ചു. ബഹളം വെച്ച പെണ്കുട്ടിയെ മര്ദ്ദിക്കുകയും പ്രതികളിലൊരാള് പീഡന ദൃശ്യങ്ങള് മൊബൈല് ഫോണില് പകര്ത്തുകയും ചെയ്തു.
പീഡന വിവരം പുറത്ത് പറഞ്ഞാല് വീഡിയോ സമൂഹ മാധ്യമങ്ങളില് പ്രചരിപ്പിക്കുമെന്ന് പ്രതികള് ഭീഷണിപ്പെടുത്തിയെന്നും പൊലീസിന് നല്കിയ പരാതിയില് പറയുന്നു. കഴിഞ്ഞ ദിവസം ദൃശ്യങ്ങള് പുറത്ത് വരുമെന്ന ഭയത്താല് 17 കാരി ടോയ്ലറ്റ് ക്ലീനര് കുടിച്ച് ആത്മഹത്യക്ക് ശ്രമിച്ചിരുന്നു. ഇതോടെയാണ് വിവരം പുറത്തറിയുന്നത്. തുടര്ന്ന് പെണ്കുട്ടിയുടെ വീട്ടുകാര് നല്കിയ പരാതിയില് പൊലീസ് എഫ്ഐആര് രജിസ്റ്റര് ചെയ്ത് പ്രതികളെ കസ്റ്റഡിയിലെടുത്തു. ഇവരെ ചോദ്യം ചെയ്തുവരികയാണെന്ന് പൊലീസ് വ്യക്തമാക്കി. പെണ്കുട്ടി ബറേലിയിലെ ആശുപത്രിയില് ചികിത്സയിലാണെന്നും അപകടനില തരണം ചെയ്തതായും പൊലീസ് അറിയിച്ചു.
