ഡൽഹി: വിജയദശമി ആഘോഷങ്ങളുടെ ഭാഗമായി ഡൽഹിയിലെ പീതംപുരയിൽ നടക്കുന്ന രാംലീലയിൽ ഇത്തവണ പാറ്റ ദഹനവും. രാവണൻ, കുംഭകർണൻ, മേഘനാഥൻ എന്നിവരുടെ കോലങ്ങൾക്കൊപ്പം 30 അടി ഉയരമുള്ള കൂറ്റൻ പാറ്റയുടെ രൂപവും കത്തിക്കാനാണ് സംഘാടകരുടെ തീരുമാനം.
പീതംപുരയിലെ ശ്രീ കേശവ് രാംലീല കമ്മിറ്റിയാണ് വ്യത്യസ്തമായ ഈ പരിപാടിക്ക് ഒരുങ്ങുന്നത്. പാറ്റയുടെ കൂറ്റൻ രൂപം തയ്യാറാക്കുന്ന ജോലികൾ പുരോഗമിക്കുകയാണ്. ബിജെപി എംഎൽഎ അശോക് ഗോയലാണ് കമ്മിറ്റിയുടെ തലവൻ.
മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ടുള്ള പ്രതിഷേധങ്ങൾക്കിടെയാണ് പാറ്റ ദഹനം ശ്രദ്ധ നേടുന്നത്. എന്നാൽ പരിപാടിക്ക് രാഷ്ട്രീയവുമായി ബന്ധമില്ലെന്നാണ് സംഘാടകരുടെ വിശദീകരണം. അഴുക്കിന്റെ പ്രതീകമായ പാറ്റയെ ദഹിപ്പിക്കുന്നതിലൂടെ സ്വച്ഛ് ഭാരത് അഭിയാൻ പ്രചാരണമാണ് ലക്ഷ്യമിടുന്നതെന്നും കമ്മിറ്റി വ്യക്തമാക്കുന്നു.
സാധാരണയായി തിന്മയുടെ പ്രതീകങ്ങളായ രാവണൻ, കുംഭകർണൻ, മേഘനാഥൻ എന്നിവരുടെ കോലങ്ങൾ കത്തിച്ചാണ് വിജയദശമി ആഘോഷിക്കുന്നത്. ഇത്തവണ അതിനൊപ്പം പാറ്റയുടെ രൂപവും ഉൾപ്പെടുത്തിയതോടെ ഡൽഹിയിലെ രാംലീല ആഘോഷം ശ്രദ്ധേയമാവുകയാണ്.
