കൊച്ചി: കൊച്ചിയിൽ വായുമലിനീകരണം രൂക്ഷമാകുന്നതായി റിപ്പോർട്ട്. വായുഗുണനിലവാര സൂചിക 188 വരെ ഉയർന്നതോടെ ആശങ്ക ശക്തമാകുന്നു. തൃപ്പൂണിത്തുറ, വൈറ്റില, ഇരുമ്പനം, അമ്പലമുകൾ, ഏലൂർ മേഖലകളിലാണ് ഉയർന്ന മലിനീകരണം രേഖപ്പെടുത്തിയിരിക്കുന്നത്.
ഗതാഗതക്കുരുക്ക്, നിർമാണ പ്രവർത്തനങ്ങൾ, വാഹനപ്പെരുപ്പം, വ്യവസായശാലകളിൽ നിന്നുള്ള മലിനീകരണം എന്നിവയാണ് വായുഗുണനിലവാരം മോശമാകാൻ പ്രധാന കാരണങ്ങളായി ചൂണ്ടിക്കാണിക്കപ്പെടുന്നത്. രാവിലെ ആറു മുതൽ എട്ടു വരെ കോടമഞ്ഞിന് സമാനമായി കാണപ്പെടുന്നത് അപകടകരമായ പുകയാകാമെന്നും വിദഗ്ധർ മുന്നറിയിപ്പ് നൽകുന്നു.
കൊച്ചിയിൽ അടുത്തിടെ രേഖപ്പെടുത്തിയ ഏറ്റവും ഉയർന്ന വായുഗുണനിലവാര സൂചിക 248 ആണെന്നാണ് റിപ്പോർട്ട്. പൂജ്യം മുതൽ 50 വരെയുള്ള എ.ക്യു.ഐ ആണ് പൊതുവെ നല്ല വായുനിലവാരമായി കണക്കാക്കുന്നത്. നിലവിലെ മലിനീകരണ സാഹചര്യം ശ്വാസകോശ സംബന്ധമായ പ്രശ്നങ്ങൾക്കും ഹൃദയാരോഗ്യത്തെ ബാധിക്കുന്നതിനും കാരണമായേക്കാമെന്നും മുന്നറിയിപ്പുണ്ട്.
വായുമലിനീകരണത്തിൽ നിന്ന് നഗരത്തെ സംരക്ഷിക്കാൻ വിവിധ ബോധവത്കരണ ക്യാമ്പയിനുകളും സംഘടിപ്പിക്കുന്നുണ്ട്. മലിനീകരണത്തോത് ഉയരുന്ന സാഹചര്യത്തിൽ പൊതുജനങ്ങൾ ജാഗ്രത പാലിക്കേണ്ടതിന്റെ ആവശ്യകതയും വിദഗ്ധർ ചൂണ്ടിക്കാട്ടുന്നു.
