തിരുവനന്തപുരം: ആർമി ഉദ്യോഗസ്ഥനാണെന്ന് തെറ്റിദ്ധരിപ്പിച്ച് വിവാഹ വാഗ്ദാനം നൽകി യുവതിയിൽ നിന്ന് നാല് ലക്ഷത്തോളം രൂപ തട്ടിയെടുത്ത കേസിൽ പ്രതി അറസ്റ്റിൽ. നെയ്യാറ്റിൻകര ഊരൂട്ടുകാല ദേവീക്ഷേത്രത്തിന് സമീപം രോഹിണി നിവാസിൽ ശ്രീജിത്ത്, 32, ആണ് വിഴിഞ്ഞം പൊലീസിന്റെ പിടിയിലായത്.
വിഴിഞ്ഞം സ്വദേശിനിയുടെ പരാതിയിലാണ് അറസ്റ്റ്. ഇൻസ്റ്റഗ്രാമിൽ ആർമി യൂണിഫോമിലുള്ള ചിത്രങ്ങൾ പോസ്റ്റ് ചെയ്ത് യുവതിയുമായി പരിചയപ്പെട്ട പ്രതി വിവാഹ വാഗ്ദാനം നൽകി പണവും ചിത്രങ്ങളും കൈവശപ്പെടുത്തിയെന്നാണ് പരാതി.
കഴിഞ്ഞ മാർച്ച് 11 മുതൽ സെപ്റ്റംബർ 16 വരെ പലതവണയായി 3,93,000 രൂപ തട്ടിയെടുത്തതായാണ് പരാതി.
സമാനമായ കേസിൽ പത്തനംതിട്ടയിൽ യുവതി ആത്മഹത്യ ചെയ്ത സംഭവത്തിലും പ്രതി നേരത്തെ അറസ്റ്റിലായിരുന്നു. പൊലീസ് ഉദ്യോഗസ്ഥനാണെന്ന് പരിചയപ്പെട്ടായിരുന്നു അന്നത്തെ തട്ടിപ്പ്.
ചോദ്യം ചെയ്യലിൽ ഏഴോളം യുവതികളെ സമാന രീതിയിൽ കബളിപ്പിച്ചതായി പ്രതി മൊഴി നൽകിയെന്ന് പൊലീസ് അറിയിച്ചു.
എസ്.ഐ പ്രശാന്ത്, എസ്.സി.പി.ഒ വിനയകുമാർ, സി.പി.ഒമാരായ റെജിൻ, സാബു, ഗോഡ്വിൻ എന്നിവരടങ്ങിയ പ്രത്യേക അന്വേഷണ സംഘമാണ് പ്രതിയെ പിടികൂടിയത്. കോടതിയിൽ ഹാജരാക്കിയ പ്രതിയെ റിമാൻഡ് ചെയ്തു.
