നോയിഡ: യമുന എക്സ്പ്രസ് വേയിൽ സ്വകാര്യ ബസിന് തീപിടിച്ച് ഒമ്പത് യാത്രക്കാർ മരിച്ചു. ഡൽഹിയിൽ നിന്ന് മഹോബയിലേക്ക് പോവുകയായിരുന്ന രാജ് കൽപ്പന ട്രാവൽസിന്റെ ബസിനാണ് ബുധനാഴ്ച രാത്രി തീപിടിച്ചത്. നിരവധി യാത്രക്കാർക്ക് പൊള്ളലേറ്റു. ഇവരെ ജെവാറിലെ കൈലാഷ് ആശുപത്രിയിൽ പ്രവേശിപ്പിച്ചു.
യമുന എക്സ്പ്രസ് വേയിൽ 33-ാം കിലോമീറ്ററിന് സമീപം രാത്രി 11.30ഓടെയായിരുന്നു അപകടം. ബസിൽ 35ഓളം യാത്രക്കാരുണ്ടായിരുന്നതായാണ് വിവരം.
ഡ്രൈവറുടെ ക്യാബിനിൽ നിന്ന് കത്തുന്ന ഗന്ധം അനുഭവപ്പെട്ടതായി യാത്രക്കാർ പറഞ്ഞിരുന്നു. ഇക്കാര്യം ഡ്രൈവറെയും കണ്ടക്ടറെയും അറിയിച്ചെങ്കിലും ബസ് നിർത്തുകയോ ഗന്ധത്തിന്റെ ഉറവിടം പരിശോധിക്കുകയോ ചെയ്തില്ലെന്നാണ് യാത്രക്കാർ പറയുന്നത്.
തുടർന്ന് ഡ്രൈവർ സീറ്റിന് സമീപം തീജ്വാല ഉയരുകയും നിമിഷങ്ങൾക്കകം ബസിനുള്ളിലേക്ക് തീ പടരുകയുമായിരുന്നു. ഭൂരിഭാഗം യാത്രക്കാരും ഉറക്കത്തിലായിരുന്നതിനാൽ രക്ഷപ്പെടാൻ ഏറെ ബുദ്ധിമുട്ടി. ചിലർ ജനൽച്ചില്ലുകൾ തകർത്ത് പുറത്തേക്ക് ചാടിയാണ് രക്ഷപ്പെട്ടത്.
പരാതിയുടെ അടിസ്ഥാനത്തിൽ പൊലീസ് കേസെടുത്ത് അന്വേഷണം ആരംഭിച്ചു.
