കൊച്ചി: അബ്കാരി കേസിൽ ആന്റോ അഗസ്റ്റിന് ഹൈക്കോടതി ജാമ്യം അനുവദിച്ചു. കർശന ഉപാധികളോടെയാണ് ജാമ്യം. വീട്ടിൽ അളവിൽ കൂടുതൽ മദ്യം സൂക്ഷിച്ചെന്ന കേസിലാണ് ആന്റോ റിമാൻഡിലായിരുന്നത്. മാനന്തവാടി ജില്ലാ ജയിലിൽ കഴിയുകയായിരുന്നു.
നേരത്തെ സുൽത്താൻ ബത്തേരി ജുഡീഷ്യൽ ഫസ്റ്റ് ക്ലാസ് മജിസ്ട്രേറ്റ് കോടതി ജാമ്യാപേക്ഷ തള്ളിയതിനെ തുടർന്നാണ് ആന്റോ ഹൈക്കോടതിയെ സമീപിച്ചത്. ജസ്റ്റിസ് കൗസർ എടപ്പഗത്തിന്റെ നേതൃത്വത്തിലുള്ള ബെഞ്ചാണ് ഹർജി പരിഗണിച്ചത്.
അതേസമയം, മദ്യം പിടികൂടിയ വയനാട് വാഴവറ്റയിലെ വീട് തന്റെ പേരിലുള്ളതല്ലെന്നും കേസിൽ ഗൂഢാലോചനയുണ്ടെന്നും ആന്റോ അഗസ്റ്റിൻ വാദിച്ചിരുന്നു. എന്നാൽ വീട് സംബന്ധിച്ച ഉടമസ്ഥാവകാശവും ഉപയോഗരീതിയും വ്യക്തമാക്കുന്ന രേഖകൾ എക്സൈസ് കോടതിയിൽ ഹാജരാക്കിയിരുന്നു.
ആന്റോയുടെ വീട്ടിൽ നടത്തിയ പരിശോധനയിൽ 138 കുപ്പികളിലായി 67 ലിറ്റർ മദ്യമാണ് പിടികൂടിയത്. പിടിച്ചെടുത്തതിൽ 12.75 ലിറ്റർ വ്യാജമദ്യമാണെന്നാണ് എക്സൈസ് റിപ്പോർട്ട്. വീട്ടിലെ 22 സി.സി.ടി.വി. ക്യാമറകളുടെ ദൃശ്യങ്ങൾ ലഭ്യമല്ലെന്നും ഡി.വി.ആർ മാറ്റിയ നിലയിലാണെന്നും എക്സൈസ് കോടതിയെ അറിയിച്ചിരുന്നു.
