തൃശൂർ: ഗുരുവായൂരിൽ രാത്രി അസമയത്ത് അലഞ്ഞുതിരിയുന്നവരെ നിരീക്ഷിക്കാൻ പ്രത്യേക പട്രോളിംഗ് സംഘം പ്രവർത്തനം തുടങ്ങി. ക്ഷേത്രനഗരിയെ കുറ്റവിമുക്തമാക്കുക ലക്ഷ്യമിട്ട് ടെമ്പിൾ പൊലീസ് സ്ട്രേഞ്ചർ പട്രോൾ ടീമിനാണ് രൂപം നൽകിയത്.
രാത്രി പത്ത് മുതൽ പന്ത്രണ്ട് വരെയാണ് പ്രധാന പരിശോധന. തെരുവിൽ കഴിയുന്നവരുടെയും അപരിചിതരുടെയും പേരും മറ്റ് വിവരങ്ങളും ഫോട്ടോയും ശേഖരിക്കും. പരിശോധനയിൽ കണ്ടെത്തുന്നവരെ മൂന്ന് വിഭാഗങ്ങളായി തിരിച്ചാണ് തുടർനടപടി.
കുറ്റകൃത്യങ്ങളിൽ ഏർപ്പെട്ടവർക്കെതിരെ നിയമനടപടി സ്വീകരിക്കും. വീട് വിട്ട് തെരുവിൽ കഴിയുന്നവരെ കുടുംബങ്ങളിലേക്ക് തിരിച്ചയക്കാനും സംരക്ഷണം ആവശ്യമുള്ളവരെ സാമൂഹ്യക്ഷേമ വകുപ്പിന്റെ സഹായത്തോടെ പുനരധിവസിപ്പിക്കാനും നടപടിയുണ്ടാകും.
ദേവസ്വം സുരക്ഷാ ജീവനക്കാരെയും ജനമൈത്രി സമിതി പ്രതിനിധികളെയും ഉൾപ്പെടുത്തിയാണ് പട്രോളിംഗ്. ഒരു സംഘത്തിൽ എസ്.ഐ. ഉൾപ്പെടെ മൂന്ന് പൊലീസുകാരും രണ്ട് പൊതുജന പ്രതിനിധികളുമുണ്ടാകും. ക്ഷേത്രനഗരിയുടെ സുരക്ഷ ശക്തമാക്കുകയാണ് ലക്ഷ്യമെന്ന് ഗുരുവായൂർ എ.സി.പി. എം. സുരേന്ദ്രൻ പറഞ്ഞു.
