മലപ്പുറം മഞ്ചേരിയിൽ വസ്ത്രത്തിന് അബദ്ധത്തിൽ തീപിടിച്ച് ഗുരുതരമായി പൊള്ളലേറ്റ് ചികിത്സയിലായിരുന്ന രണ്ടാം ക്ലാസ് വിദ്യാർഥിനി മരിച്ചു. തൃക്കലങ്ങോട് സ്വദേശി സുനീഷിന്റെ മകൾ അവനി ആണ് കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിലിരിക്കെ മരിച്ചത്.
ആമയൂർ എ.എൽ.പി സ്കൂളിലെ രണ്ടാം ക്ലാസ് വിദ്യാർഥിനിയായിരുന്നു അവനി.
രണ്ട് മാസം മുൻപാണ് ദീപം തെളിക്കുന്നതിനിടെ കുട്ടിയുടെ വസ്ത്രത്തിലേക്ക് തീ പടർന്ന് ഗുരുതരമായി പൊള്ളലേറ്റത്. തുടർന്ന് കോഴിക്കോട് മെഡിക്കൽ കോളജ് ആശുപത്രിയിൽ ചികിത്സയിൽ കഴിയുകയായിരുന്നു.
മൂന്നാഴ്ച മുൻപ് ആരോഗ്യനില മെച്ചപ്പെട്ടതിനെ തുടർന്ന് ആശുപത്രിയിൽനിന്ന് വീട്ടിലേക്ക് മടങ്ങിയിരുന്നു. എന്നാൽ പിന്നീട് ന്യൂമോണിയ ബാധിച്ചതിനെ തുടർന്ന് വീണ്ടും മെഡിക്കൽ കോളജ് ആശുപത്രിയിൽ പ്രവേശിപ്പിച്ചു.
ചികിത്സയ്ക്കിടെ ആരോഗ്യനില വഷളായതോടെയാണ് മരണം സംഭവിച്ചത്.
ജിൻഷിയാണ് അവനിയുടെ മാതാവ്. അമയ് മഹാദേവ് സഹോദരനാണ്.
