മലപ്പുറം: കൊണ്ടോട്ടിയിൽ കോളേജ് ഓണാഘോഷത്തിനിടെ രാസലഹരിയായ എംഡിഎംഎ പിടികൂടി. വിദ്യാർഥികൾ എത്തിയ കാറിൽ നിന്നാണ് ഒരു ഗ്രാം എംഡിഎംഎ പിടിച്ചെടുത്തത്.
എക്സൈസ് വാഹനം കണ്ടതോടെ കാറിലുണ്ടായിരുന്ന വിദ്യാർഥികൾ ഇറങ്ങി ഓടുകയായിരുന്നു. സംഭവത്തിൽ കണ്ടാലറിയാവുന്ന മൂന്ന് പേരെ പ്രതികളാക്കി എക്സൈസ് അന്വേഷണം ആരംഭിച്ചു.
അതേസമയം, ഓപ്പറേഷൻ തൂഫാന്റെ ഭാഗമായി സംസ്ഥാന വ്യാപകമായി നടത്തിയ പരിശോധനയിൽ കഴിഞ്ഞ ദിവസം 74 പേർ കൂടി അറസ്റ്റിലായി. ഇതോടെ ആകെ അറസ്റ്റിലായവരുടെ എണ്ണം 10,015 ആയി. 9,280 കേസുകളാണ് ഇതുവരെ രജിസ്റ്റർ ചെയ്തിട്ടുള്ളത്.
പരിശോധനകളിൽ ഇതുവരെ 8,289.409 ഗ്രാം എംഡിഎംഎയും 1,004.784 കിലോഗ്രാം കഞ്ചാവും 2,382 കഞ്ചാവ് ചെടികളും പിടിച്ചെടുത്തിട്ടുണ്ട്.
നിലവിലെ കണക്കുകൾ പ്രകാരം ഏറ്റവും കൂടുതൽ കേസുകൾ രജിസ്റ്റർ ചെയ്തിരിക്കുന്നത് കോഴിക്കോട് സിറ്റിയിലാണ്. 929 കേസുകളാണ് കോഴിക്കോട് സിറ്റിയിൽ രജിസ്റ്റർ ചെയ്തത്.
അതേസമയം, ഏറ്റവും കൂടുതൽ അറസ്റ്റ് നടന്നത് മലപ്പുറം ജില്ലയിലാണ്. 999 പേരാണ് മലപ്പുറത്ത് അറസ്റ്റിലായത്. 875 കേസുകളുമായി കേസുകളുടെ എണ്ണത്തിൽ മലപ്പുറം ജില്ല രണ്ടാം സ്ഥാനത്താണ്.
