കുറ്റിപ്പുറം: മുസ്ലിം സർവീസ് സൊസൈറ്റി (MSS) കുറ്റിപ്പുറം യൂണിറ്റിന്റെ പുതിയ ഓഫീസ് കുറ്റിപ്പുറം ബൈപ്പാസ് റോഡിൽ ഉദ്ഘാടനം ചെയ്തു. MSS മലപ്പുറം ജില്ലാ പ്രസിഡന്റ് ഇ.പി. അബ്ദുറഹ്മാൻ മാസ്റ്റർ ഉദ്ഘാടനം നിർവഹിച്ചു.
1980-ൽ കാരുണ്യത്തിന്റെയും സേവനത്തിന്റെയും ആദർശങ്ങളുമായി പ്രവർത്തനം ആരംഭിച്ച മുസ്ലിം സർവീസ് സൊസൈറ്റി, ജാതിമത വ്യത്യാസമില്ലാതെ സഹജീവികൾക്ക് കാരുണ്യത്തിന്റെ സ്പർശം നൽകുകയെന്ന ലക്ഷ്യത്തോടെയാണ് പ്രവർത്തിക്കുന്നത്. 1990-ൽ പ്രഗൽഭരും പ്രശസ്തരുമായ വ്യക്തികൾ ഒരുമിച്ചുകൂടിയാണ് കുറ്റിപ്പുറം യൂണിറ്റ് രൂപീകരിച്ചത്.
കാൻസർ, ഡയാലിസിസ് രോഗികൾക്ക് മാസാന്ത സഹായം, അർഹരായവർക്ക് വീട് നിർമ്മാണ സഹായം, വിദ്യാർത്ഥികൾക്ക് പഠന സഹായം, തുടർപഠനത്തിന് പലിശരഹിത വായ്പ എന്നിവയാണ് യൂണിറ്റിന്റെ പ്രധാന പ്രവർത്തനങ്ങൾ.
നിലവിൽ നൂറോളം അംഗങ്ങളുള്ള യൂണിറ്റിന്റെ പ്രസിഡന്റായി തുറക്കൽ മുഹമ്മദ്, സെക്രട്ടറിയായി ഖാദർ ചോലക്കൽ, ട്രഷററായി ഖത്തർ അലി എന്നിവർ പ്രവർത്തിക്കുന്നു. ടി.എം. മുത്തുമണി, ആലിബാവ എന്നിവർ വൈസ് പ്രസിഡന്റുമാരും റാഫി കഴുത്തല്ലൂർ, ഭാവനൂ, പാണ്ടികശാല എന്നിവർ ജോയിന്റ് സെക്രട്ടറിമാരുമാണ്.
പോഷക സംഘടനയായ യൂത്ത് വിങ്ങിന്റെ പ്രസിഡന്റായി കെ.കെ. നൗഫലും സെക്രട്ടറിയായി മുഹമ്മദ് ഷാഫിയും പ്രവർത്തിക്കുന്നു.
ഉദ്ഘാടന ചടങ്ങിൽ സംസ്ഥാന സെക്രട്ടറി ഫസലുദ്ദീൻ, ജില്ലാ ട്രഷറർ ഡോ. ഹസ്സൻ ബാബു, യൂത്ത് വിങ് സംസ്ഥാന സെക്രട്ടറി സാദിഖ് വട്ടപ്പറമ്പ്, ജില്ലാ പ്രസിഡന്റ് ഇസ്ഹാഖ്, MSS ജില്ലാ സെക്രട്ടറി കെ.വി. മുഹമ്മദ് കുട്ടി, സംസ്ഥാന എക്സിക്യൂട്ടീവ് പി.കെ. മുഹമ്മദലി ഹാജി, ഡോ. മെയ്തീൻകുട്ടി എന്നിവർ ആശംസകൾ അർപ്പിച്ചു.
