ഇന്ത്യൻ രാഷ്ട്രീയ ചരിത്രത്തിൽ പുതിയൊരു നാഴികക്കല്ല് കുറിക്കാൻ പ്രധാനമന്ത്രി നരേന്ദ്ര മോദി ഒരുങ്ങുന്നു. തിരഞ്ഞെടുപ്പിലൂടെ അധികാരത്തിലെത്തി, രാജ്യത്ത് ഏറ്റവും കൂടുതൽ കാലം ‘തുടർച്ചയായി’ ഭരണത്തിലിരുന്ന പ്രധാനമന്ത്രിയെന്ന റെക്കോർഡാണ് നരേന്ദ്ര മോദി സ്വന്തമാക്കുന്നത്. സ്വതന്ത്ര ഇന്ത്യയുടെ പ്രഥമ പ്രധാനമന്ത്രി ജവഹർലാൽ നെഹ്റുവിന്റെ പതിറ്റാണ്ടുകൾ പഴക്കമുള്ള റെക്കോർഡാണ് മോദി മറികടക്കുന്നത്. ഇനി വെറും 5 നാളുകൾ കൂടി പിന്നിടുന്നതോടെ ജൂൺ 10-ന് നരേന്ദ്ര മോദി ഈ അപൂർവ്വ നേട്ടത്തിന് അർഹനാകും.
ഇന്ത്യൻ ജനാധിപത്യത്തിന്റെ ചരിത്ര പുസ്തകത്തിൽ ഇനി നരേന്ദ്ര മോദിക്ക് പുതിയൊരു സ്ഥാനം. ജനാധിപത്യപരമായി തിരഞ്ഞെടുക്കപ്പെട്ട ഒരു സർക്കാരിന്റെ തലവനായി തുടർച്ചയായി 4,399 ദിവസങ്ങൾ പൂർത്തിയാക്കിയാണ് നരേന്ദ്ര മോദി ചരിത്രത്തിന്റെ ഭാഗമാകുന്നത്. 1952-ൽ ആദ്യ പൊതുതിരഞ്ഞെടുപ്പിന് ശേഷം നിലവിൽ വന്ന ജവഹർലാൽ നെഹ്റു സർക്കാരിന്റെ റെക്കോർഡാണ് ജൂൺ 10-ഓടെ പ്രധാനമന്ത്രി തിരുത്തിക്കുറിക്കുക.
1952 മേയ് 13-ന് സത്യപ്രതിജ്ഞ ചെയ്ത് അധികാരമേറ്റ നെഹ്റു, 1964 മേയ് 27-ന് അന്തരിക്കുന്നത് വരെ തുടർച്ചയായി 4,398 ദിവസങ്ങളാണ് പ്രധാനമന്ത്രി പദവിയിൽ ഇരുന്നത്. എന്നാൽ 2014 മേയ് 26-ന് ആദ്യമായി രാജ്യത്തിന്റെ ഭരണസാരഥ്യം ഏറ്റെടുത്ത നരേന്ദ്ര മോദി, മൂന്ന് പൊതുതിരഞ്ഞെടുപ്പുകളിലും വോട്ടർമാരുടെ ജനവിധി നേടി ഈ പദവിയിൽ തുടരുകയാണ്.
“റെക്കോർഡുകൾ ഒന്നൊന്നായി തകർത്ത് മുന്നേറുന്ന നരേന്ദ്ര മോദി, കഴിഞ്ഞ വർഷം ജൂലൈ 25-ഓടെ മുൻ പ്രധാനമന്ത്രി ഇന്ദിരാഗാന്ധിയുടെ ഏറ്റവും ദൈർഘ്യമേറിയ തടസ്സമില്ലാത്ത ഭരണകാലയളവിനെയും (4,077 ദിവസങ്ങൾ) മറികടന്നിരുന്നു.”
നെഹ്റുവിന് ശേഷം ഭരണത്തിലിരിക്കെത്തന്നെ തുടർച്ചയായി മൂന്ന് ലോക്സഭാ തിരഞ്ഞെടുപ്പുകളിൽ വിജയം നേടുന്ന ആദ്യ പ്രധാനമന്ത്രിയെന്ന നേട്ടവും ഇതിനോടകം മോദി സ്വന്തമാക്കിയിട്ടുണ്ട്. ഇന്ത്യയുടെ ജനാധിപത്യ ചരിത്രത്തിൽ ഈ തുടർച്ചയായ ഭരണം വലിയൊരു രാഷ്ട്രീയ നേട്ടമായാണ് വിലയിരുത്തപ്പെടുന്നത്.
