കൊല്ലം: അവധി ആഘോഷിക്കാൻ എത്തിയ സംഘം സഞ്ചരിച്ചിരുന്ന കാർ താഴ്ചയിലേക്ക് മറിഞ്ഞ് ഒരാൾ മരിച്ചു. പുനലൂർ മാർക്കറ്റ് ജംഗ്ഷനിലെ ഓട്ടോ ഡ്രൈവറായ നെടുങ്കയം സ്വദേശി ഡോയി മോൻ (ടോയ്) ആണ് അപകടത്തിൽ മരണപ്പെട്ടത്. കാറിലുണ്ടായിരുന്ന മൂന്ന് പേർക്ക് പരിക്കേറ്റിട്ടുണ്ട്. പുനലൂർ കേളങ്കാവ് ആർ.പി.എൽ മേഖലയിലെ ഹെലിപാഡ് ഭാഗത്ത് വെച്ചായിരുന്നു അപകടം.
ഇന്ന് വൈകിട്ട് ഏഴുമണിയോടെയായിരുന്നു നാടിനെ നടുക്കിയ അപകടം സംഭവിച്ചത്. അവധി ദിനം ആഘോഷിക്കാനായി പുനലൂർ സ്വദേശികളായ ഡോയി മോൻ, ജിഷ്ണു, റഫീഖ്, അലി എന്നിവരടങ്ങുന്ന നാലംഗ സംഘം സഞ്ചരിച്ച സ്വിഫ്റ്റ് കാറാണ് അപകടത്തിൽപ്പെട്ടത്. ഹെലിപാഡ് ഭാഗത്ത് വെച്ച് കാറിന്റെ നിയന്ത്രണം നഷ്ടപ്പെടുകയും തുടർന്ന് റോഡരികിലെ വലിയ താഴ്ചയിലേക്ക് മറിയുകയുമായിരുന്നു.
അപകട ശബ്ദം കേട്ട് ഓടിക്കൂടിയ നാട്ടുകാരും, വിവരമറിഞ്ഞ് സ്ഥലത്തെത്തിയ പുനലൂർ ഫയർഫോഴ്സും പോലീസും ചേർന്നാണ് ഉടനടി രക്ഷാപ്രവർത്തനം നടത്തിയത്. കാറിനുള്ളിൽ കുടുങ്ങിക്കിടന്ന യാത്രികരെ ഏറെ ശ്രമപ്പെട്ടാണ് പുറത്തെടുത്തത്. ഇവരെ ഉടൻ തന്നെ പുനലൂർ താലൂക്ക് ആശുപത്രിയിൽ എത്തിച്ചെങ്കിലും ഗുരുതരമായി പരിക്കേറ്റ ഡോയി മോന്റെ ജീവൻ രക്ഷിക്കാനായില്ല. പരിക്കേറ്റ മറ്റു മൂന്നുപേരും നിലവിൽ താലൂക്ക് ആശുപത്രിയിൽ ചികിത്സയിലാണ്.
മരണപ്പെട്ട ഡോയി മോന്റെ മൃതദേഹം പുനലൂർ താലൂക്ക് ആശുപത്രി മോർച്ചറിയിൽ സൂക്ഷിച്ചിരിക്കുകയാണ്. സംഭവത്തിൽ ഏരൂർ പോലീസ് ഇൻക്വസ്റ്റ് നടപടികൾ പൂർത്തിയാക്കിയ ശേഷം തുടർനടപടികൾ സ്വീകരിക്കും.
