തുലാമാസ പൂജകള്‍ക്കായി നടതുറന്ന ശബരിമലയില്‍ വന്‍ ഭക്തജനത്തിരക്ക്. മൂന്നു മണിക്കൂര്‍ കൂടി ദര്‍ശന സമയം നീട്ടി. ഇന്ന് ഒരു ദിവസത്തേക്ക് മാത്രമാണ് ക്രമീകരണം. ഉച്ചയ്ക്ക് നടയടയ്ക്കുന്നത് മൂന്നു മണിയിലേക്കും നീട്ടി. വൈകിട്ട് നാലുമണിക്ക് വീണ്ടും നടതുറക്കും. ഹരിവരാസനത്തിന് ശേഷം രാത്രി 11 മണിയോടെ വീണ്ടും നട അടയ്ക്കും. പടിപൂജ, ഉദയാസ്തമയ പൂജ സമയങ്ങളിലെ ദര്‍ശനനിയന്ത്രണത്തോട് ഭക്തര്‍ സഹകരിക്കണമെന്നും ദേവസ്വം വകുപ്പ് ആവശ്യപ്പെട്ടു. നേരത്തെ സന്നിധാനത്ത് ഉച്ചയ്ക്ക് ഒരു മണിക്ക് നടയടച്ച് അഞ്ചുമണിയോടെ നട തുറന്നിരുന്നു.
അതേസമയം, യാതൊരു വിധത്തിലുള്ള മുന്നൊരുക്കങ്ങളും തുലാമാസ പൂജകള്‍ക്കായി നടതുറന്നപ്പോള്‍ നടത്തിയിരുന്നില്ലെന്നും ഭക്തര്‍ക്ക് ദര്‍ശനം സുഗമമാക്കണമെന്നും പ്രതിപക്ഷനേതാവ് വിടി സതീശന്‍ കൂട്ടിച്ചേര്‍ത്തു. നിയന്ത്രണങ്ങള്‍ പാളാന്‍ പ്രധാന കാരണം പൊലീസിന്റെ എണ്ണത്തിലെ കുറവാണ് . ഇതര സംസ്ഥാനത്തുനിന്നും മറ്റും എത്തിയവര്‍ ബാരിക്കേഡ് ചാടിക്കടക്കാന്‍ ശ്രമിച്ചതോടെ സ്ഥിതി കൂടുതല്‍ മോശമായെന്നും വിമര്‍ശനങ്ങളുണ്ട്.
