വളാഞ്ചേരി: തന്റെ സിനിമയുമായി ബന്ധപ്പെട്ട വിവാദങ്ങളെ കൈയ്യടിയോടെ സ്വീകരിക്കുന്നതായി നടന്‍ ഉണ്ണിമുകുന്ദന്‍. വളാഞ്ചേരിയില്‍ ഇ ചാനലിനോട് സംസാരിക്കുകയായിരുന്നു അദ്ദേഹം. വിഷ്ണു ശശിശങ്കര്‍ സംവിധാനം ചെയ്ത മാളികപ്പുറമെന്ന സിനിമയുടെ പ്രൊമോഷനായി വളാഞ്ചേരിയില്‍ എത്തിയതായിരുന്നു ഉണ്ണിമുകുന്ദന്‍.
പ്രേക്ഷകരോടൊപ്പം നേരിട്ട് സിനിമ കാണാന്‍ ഉണ്ണിമുകുന്ദനും സംഘവും കാര്‍ത്തിക തിയേറ്ററിലെത്തി. സിനിമ കണ്ടിറങ്ങിയ താരങ്ങള്‍ ആരാധകര്‍ക്കൊപ്പം കേക്ക് മുറിച്ച് ആഘോഷം പങ്കിട്ടു. സിനിമ പ്രേക്ഷകര്‍ സ്വീകരിച്ചതിന്റെ സന്തോഷത്തിലായിരുന്നു ചിത്രത്തിലെ പ്രധാനകഥാപാത്രമായെത്തിയ ഉണ്ണിമുകുന്ദന്‍.
കല്യാണി എന്ന എട്ടു വയസ്സുകാരിയുടെയും അവളുടെ സൂപ്പര്‍ ഹീറോ ആയ അയ്യപ്പന്റെയും കഥ പറയുന്ന ചിത്രമാണ് മാളികപ്പുറം. ദേവനന്ദയും ശ്രീപദും ചിത്രത്തില്‍ പ്രധാനപ്പെട്ട കഥാപാത്രങ്ങളായി വേഷമിട്ടിട്ടുണ്ട്. ഇവരും നടി ആല്‍ഫിയും മറ്റും ഉണ്ണിമുകുന്ദനോടൊപ്പമുണ്ടായിരുന്നു. പ്രിയ വേണു, നീത പിന്റോ എന്നിവരാണ് ചിത്രത്തിന്റെ നിര്‍മ്മാണം. മാളികപ്പുറം എന്ന ഹിറ്റ് ചിത്രത്തിന്റെ തിരക്കഥ എഴുതിയിരിക്കുന്നത് അഭിലാഷ് പിള്ളയാണ്.
