തൃശൂരിൽ മാരക മയക്കുമരുന്നായ എം.ഡി.എം.എയുമായി രണ്ട് പേർ പിടിയിൽ. വിദേശത്ത് മയക്കുമരുന്ന് കേസിൽ ശിക്ഷ അനുഭവിച്ച ശേഷം നാട്ടിലെത്തിയ വലപ്പാട് സ്വദേശികളെയാണ് പൊലീസ് അറസ്റ്റ് ചെയ്തത്.
വലപ്പാട് സ്വദേശി മുഹമ്മദ് റാഷിദ്, പുല്ലൂറ്റ് സ്വദേശി ഷംനാദ് എന്നിവരാണ് തൂഫാൻ സ്പെഷ്യൽ സ്ക്വാഡും വലപ്പാട് പൊലീസും ചേർന്ന് പിടികൂടിയത്. ഇവരിൽ നിന്ന് 20 ഗ്രാമോളം എം.ഡി.എം.എ പിടിച്ചെടുത്തു.
ഗൾഫിൽ വച്ച് മയക്കുമരുന്ന് കേസിൽ ഷംനാദ് ആറ് വർഷവും മുഹമ്മദ് റാഷിദ് ഒന്നര വർഷവും ജയിൽ ശിക്ഷ അനുഭവിച്ചിട്ടുണ്ടെന്ന് പൊലീസ് അറിയിച്ചു. ശിക്ഷ പൂർത്തിയാക്കി നാട്ടിലെത്തിയ ശേഷവും ഇവർ മയക്കുമരുന്ന് ഇടപാടുകൾ തുടർന്നതായാണ് അന്വേഷണത്തിൽ കണ്ടെത്തിയത്.
തൃശൂർ റൂറൽ ജില്ലാ പൊലീസ് മേധാവിക്ക് ലഭിച്ച രഹസ്യ വിവരത്തിന്റെ അടിസ്ഥാനത്തിൽ നടത്തിയ പരിശോധനയിലാണ് പ്രതികൾ പിടിയിലായത്.
കൊടുങ്ങല്ലൂർ ഡിവൈ.എസ്.പി പ്രമോദ്, തൃശൂർ റൂറൽ നാർക്കോട്ടിക് സെൽ ഡിവൈ.എസ്.പി അബ്ദുൾ സലാം എന്നിവരുടെ നേതൃത്വത്തിലുള്ള സംഘമാണ് പരിശോധന നടത്തിയത്. തൂഫാൻ സ്പെഷ്യൽ സ്ക്വാഡും വലപ്പാട് പൊലീസ് സംഘവും ചേർന്നാണ് പ്രതികളെ പിടികൂടിയത്.
