കുറ്റിപ്പുറം: റെയിൽവേ സ്റ്റേഷനിലെ രണ്ടാം പ്ലാറ്റ് ഫോമിൽ നേരിട്ടെത്തുന്നവർ ഇനി ടിക്കറ്റെടുക്കാൻ ബുദ്ധിമുട്ടേണ്ടി വരില്ല. അമൃത് ഭാരത് പദ്ധതിയിൽ ഉൾപ്പെടുത്തി നവീകരിച്ച കുറ്റിപ്പുറം റെയിൽവേ സ്റ്റേഷനിലെ രണ്ടാം പ്ലാറ്റ് ഫോമിൽ പരീക്ഷണ അടിസ്ഥാനത്തിൽ ഓട്ടമാറ്റിക് ടിക്കറ്റ് വെൻഡിങ് മെഷീൻ സംവിധാനം നടപ്പാക്കുന്നു.
ഇതിനു വേണ്ട നടപടികൾ പുരോഗമിക്കുകയാണ്. അൺറിസേർവ്ഡ് ടിക്കറ്റായിരിക്കും ലഭ്യമാക്കുക. ഇതു വിജയിക്കുകയാണെങ്കിൽ പൂർണ സജ്ജമായ ടിക്കറ്റ് കൗണ്ടർ ആരംഭിക്കുമെന്നാണ് റെയിൽവേ അധികൃതർ പറയുന്നത്. വളാഞ്ചേരി ഭാഗത്ത് നിന്നും വരുന്ന വാഹനങ്ങൾ രണ്ടാം പ്ലാറ്റ് ഫോമിലെ പാർക്കിങ് സ്ഥലം ഉപയോഗപ്പെടുത്തമെന്ന നിർദേശിച്ച് റെയിൽവേ പരിസരത്ത് ബോർഡ് സ്ഥാപിച്ചു കഴിഞ്ഞു. സ്റ്റാളുകളും, ടോയ്‌ലറ്റ് സൗകര്യവും രണ്ടാം പ്ലാറ്റ് ഫോമിൽ ഒരുക്കിയിട്ടുണ്ട്.
ഉദ്ഘാടനം ഈ മാസം
കുറ്റിപ്പുറം റെയിൽവേ സ്റ്റേഷന്റെ 98 ശതമാനം നവീകരണ ജോലികളും പൂർത്തിയായി. ഇപ്പോൾ ട്രോളി പാത നിർമാണമാണ് നടക്കുന്നത്. കുറ്റിപ്പുറം ഹയർസെക്കൻഡറി സ്കൂൾ ഭാഗത്തെ റെയിൽവേ ട്രാക്കുകൾ ബന്ധിപ്പിച്ചു കട്ടവിരിച്ചാണ് ട്രോളി പാത നിർമിക്കുന്നത്. രണ്ട് ഘട്ടങ്ങളിലായാണ് റെയിൽവേ സ്റ്റേഷൻ നവീകരണം പൂർത്തികരിച്ചത്.
ഒന്നാം ഘട്ടത്തിൽ ലിഫ്റ്റ് , ഒന്നാം പ്ലാറ്റ് ഫോമിലെ പുതിയ മേൽക്കൂരകൾ, കസേരകൾ, എസി വെയ്റ്റിങ് മുറി, ടോയ്‌ലറ്റ്, പാർക്കിങ് സ്ഥലം വിപുലപ്പെടുത്തൽ എന്നിവ നടത്തി. പദ്ധതിയുടെ രണ്ടാം ഘട്ടത്തിലാണ് രണ്ടാം പ്ലാറ്റ് ഫോമിലെ പുതിയ പാർക്കിങ് സ്ഥലം, ടോയ്‌ലറ്റ് കോംപ്ലക്സ്, ഇരിപ്പിടങ്ങൾ, ട്രോളി പാത എന്നിവ നിർമിച്ചിരിക്കുന്നത്. ഈ മാസം അവസാനം പദ്ധതി പൂർത്തികരണ ഉദ്ഘാടനം നടക്കും.
