സംസ്ഥാനത്ത് മഴ കനക്കുന്നു. 8 ജില്ലകളില് യെല്ലോ അലേര്ട്ട്. തിരുവനന്തപുരം, കൊല്ലം, പത്തനംതിട്ട, ഇടുക്കി, എറണാകുളം, തൃശൂര്, പാലക്കാട്, മലപ്പുറം ജില്ലകള്ക്ക് യെല്ലോ അലേര്ട്ട് പ്രഖ്യാപിച്ചു. നാളെയും ഇടുക്കി, പാലക്കാട്, മലപ്പുറം ജില്ലകളില് യെല്ലോ അലേര്ട്ട് ആണ്. ഒറ്റപ്പെട്ട ശക്തമായ മഴയ്ക്കുള്ള സാധ്യതയാണ് പ്രവചിക്കപ്പെട്ടിരിക്കുന്നത്.
64.5 മില്ലിമീറ്റര് മുതല് 115.5 മില്ലിമീറ്റര് വരെ മഴ 24 മണിക്കൂറില് ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്. തെക്കന് ബംഗാള് ഉള്ക്കടലിന് മുകളിലായി സ്ഥിതി ചെയ്യുന്ന തീവ്ര ന്യൂനമര്ദ്ദത്തിന്റെ ഫലമായാണ് സംസ്ഥാനത്ത് മഴ കനക്കുന്നത്. സംസ്ഥാനത്ത് വരുന്ന അഞ്ച് ദിവസം കൂടി മഴ തുടരുമെന്ന് കാലാവസ്ഥ വകുപ്പ് മുന്നറിയിപ്പില് പറയുന്നു. തെക്കന് കേരളതീരത്ത് മത്സ്യബന്ധനത്തിന് വിലക്കേര്പ്പെടുത്തി.
തമിഴ്നാട്ടില് മഴ ശക്തമാകുന്നു. ചെന്നെ അടക്കം സംസ്ഥാനത്തെ 16 ജില്ലകളിലും പുതുച്ചേരിയിലും കാരയ്ക്കലിലും ഓറഞ്ച് അലര്ട്ട് പ്രഖ്യാപിച്ചു. നാല് മണിക്കൂറിലേറെയായി രാമേശ്വരത്തും പാമ്പനിലും മൊബൈല് ഫോണ് നെറ്റ്വര്ക്കില് പ്രശ്നങ്ങള് നേരിടുന്നുണ്ട്.
മഴയെ തുടര്ന്ന് മയിലാട്തുറെ, നാഗപട്ടണം, തിരുവാരൂര് ജില്ലകളില് വിദ്യാഭ്യാസ സ്ഥാപനങ്ങള്ക്ക് ഇന്ന് അവധിയാണ്. ഡെല്റ്റ ജില്ലകളിലും പുതുച്ചേരിയിലും ശക്തമായ മഴയ്ക്ക് സാധ്യതയുണ്ടെന്നാണ് കാലാവസ്ഥ റിപ്പോര്ട്ടുകള്. മയിലാട്തുറെ അടക്കമുള്ള മേഖലകളില് കടല് പ്രക്ഷുബ്ധമാണ്. മല്സ്യത്തൊഴിലാളികള് കടലില് പോകരുതെന്ന് മുന്നറിയിപ്പ് നല്കിയിട്ടുണ്ട്.
