തമിഴ് രാഷ്ട്രീയത്തിലെ വമ്പൻ അട്ടിമറിക്ക് പിന്നാലെ ഭരണസിരാകേന്ദ്രത്തിലും നിർണ്ണായക മാറ്റങ്ങൾ വരുത്തി മുഖ്യമന്ത്രി സി. ജോസഫ് വിജയ്. തന്റെ രാഷ്ട്രീയ വിജയവും ‘സുനാമി തരംഗവും’ മുൻകൂട്ടി പ്രവചിച്ച പ്രശസ്ത ജ്യോതിഷിയും ടിവികെ വക്താവുമായ റിക്കി രാധൻ പണ്ഡിറ്റിനെ മുഖ്യമന്ത്രിയുടെ ഓഫീസർ ഓൺ സ്പെഷ്യൽ ഡ്യൂട്ടി (OSD) ആയി നിയമിച്ചു. ഇത് സംബന്ധിച്ച ഔദ്യോഗിക ഉത്തരവ് പ്രിൻസിപ്പൽ സെക്രട്ടറി പുറത്തിറക്കി.
തമിഴ്നാട് രാഷ്ട്രീയത്തിൽ ജ്യോതിഷത്തിന് എന്നും വലിയ സ്ഥാനമുണ്ടായിരുന്നു. ആ ചരിത്രം ആവർത്തിച്ചുകൊണ്ടാണ് മുഖ്യമന്ത്രി വിജയ് തന്റെ വിശ്വസ്തനും പ്രശസ്ത ജ്യോതിഷിയുമായ റിക്കി രാധൻ പണ്ഡിറ്റിന് പുതിയ ചുമതല നൽകിയിരിക്കുന്നത്. തമിഴ്നാട് സർക്കാരിന്റെ പ്രിൻസിപ്പൽ സെക്രട്ടറി റീത്ത ഹരീഷ് തക്കർ ഒപ്പിട്ട ഉത്തരവ് പ്രകാരം, ചുമതലയേൽക്കുന്ന ദിവസം മുതൽ നിയമനം പ്രാബല്യത്തിൽ വരും.
ആരാണ് റിക്കി രാധൻ പണ്ഡിറ്റ്?
- അനുഭവസമ്പത്ത്: വേദ ജ്യോതിഷം, സംഖ്യാശാസ്ത്രം എന്നിവയിൽ നാല് പതിറ്റാണ്ടിന്റെ പരിചയമുള്ള വ്യക്തിയാണ് അദ്ദേഹം.
- വിജയുമായുള്ള ബന്ധം: വിജയ് രാഷ്ട്രീയത്തിലേക്ക് ഇറങ്ങുന്നതിന് മുൻപേ തന്നെ അദ്ദേഹത്തിന്റെ പേഴ്സണൽ ജ്യോതിഷിയായി പണ്ഡിറ്റ് കൂടെയുണ്ട്. വിജയിന്റെ ജാതകം “സുനാമി പോലുള്ള” ശക്തിയുള്ളതാണെന്ന് വിശേഷിപ്പിച്ച അദ്ദേഹം, ടിവികെയുടെ വിജയം മാസങ്ങൾക്ക് മുൻപേ പ്രവചിച്ചിരുന്നു.
- പഴയകാലം: പണ്ഡിറ്റ് വെട്രിവേൽ എന്ന പേരിൽ അറിയപ്പെട്ടിരുന്ന അദ്ദേഹം 2008-ൽ ഡൽഹിയിലേക്ക് മാറിയ ശേഷമാണ് റിക്കി രാധൻ പണ്ഡിറ്റ് എന്ന് പേര് മാറ്റിയത്.
രാഷ്ട്രീയ പ്രാധാന്യം: നേരത്തെ ജയലളിത ഉൾപ്പെടെയുള്ള നേതാക്കളുമായി അടുത്ത ബന്ധം പുലർത്തിയിരുന്ന പണ്ഡിറ്റ്, ടിവികെ വക്താവ് എന്ന നിലയിൽ ജ്യോതിഷവും രാഷ്ട്രീയവും ഇടകലർത്തിയുള്ള പ്രസ്താവനകളിലൂടെ ശ്രദ്ധേയനായിരുന്നു. 2026-ലെ തിരഞ്ഞെടുപ്പിൽ വിജയ് അധികാരത്തിലെത്തുമെന്ന് ഉറപ്പിച്ചു പറഞ്ഞ പണ്ഡിറ്റ്, തിരഞ്ഞെടുപ്പ് വിജയത്തിന് ശേഷം വിജയുടെ വീട്ടിലെത്തി കൂടിക്കാഴ്ച നടത്തിയിരുന്നു.
ഡിഎംകെ, എഐഎഡിഎംകെ കക്ഷികളുടെ പതിറ്റാണ്ടുകൾ നീണ്ട ഭരണത്തിന് അന്ത്യം കുറിച്ച് അധികാരത്തിലെത്തിയ വിജയ് സർക്കാരിൽ, ഒരു ജ്യോതിഷിയെ ഒഎസ്ഡിയായി നിയമിച്ച നടപടി വലിയ രാഷ്ട്രീയ ചർച്ചകൾക്ക് വഴി വെച്ചിട്ടുണ്ട്. പ്രവചനങ്ങളും വിശ്വാസങ്ങളും ഭരണത്തിൽ എത്രത്തോളം സ്വാധീനം ചെലുത്തുമെന്ന് വരും ദിവസങ്ങളിൽ കണ്ടറിയാം.
