മാന്നാർ ചെന്നിത്തലയിൽ കാണാതായ വയോധികന്റെ മൃതദേഹം വീടിന് സമീപത്തെ ആളൊഴിഞ്ഞ പുരയിടത്തിൽ കണ്ടെത്തി. ചെറുകോൽ ആറ്റുകടവിൽ ഗോപി എന്ന 82കാരനെയാണ് മരിച്ച നിലയിൽ കണ്ടെത്തിയത്.
ശനിയാഴ്ച ഉച്ചയോടെ വീട്ടിൽനിന്ന് പുറത്തുപോയ ഗോപിയെ രാത്രി വൈകിയും കാണാതായതിനെ തുടർന്ന് ബന്ധുക്കൾ മാന്നാർ പൊലീസിൽ പരാതി നൽകുകയായിരുന്നു.
ഞായറാഴ്ച രാവിലെ ബന്ധുക്കളും നാട്ടുകാരും ചേർന്ന് പ്രദേശത്തെ സി.സി.ടി.വി ദൃശ്യങ്ങൾ പരിശോധിച്ച് നടത്തിയ അന്വേഷണത്തിനൊടുവിലാണ് വീടിന് ഏകദേശം നൂറ് മീറ്റർ അകലെയുള്ള പുരയിടത്തിൽ രാവിലെ പത്ത് മണിയോടെ മൃതദേഹം കണ്ടെത്തിയത്.
മാന്നാർ പൊലീസ് സ്ഥലത്തെത്തി തുടർനടപടികൾ സ്വീകരിച്ചു. മൃതദേഹം പോസ്റ്റ്മോർട്ടത്തിനായി വണ്ടാനം മെഡിക്കൽ കോളേജ് ആശുപത്രിയിലേക്ക് മാറ്റി. പോസ്റ്റ്മോർട്ടത്തിന് ശേഷം തിങ്കളാഴ്ച സംസ്കാരം നടത്തും.
പരേതയായ വിജയമ്മയാണ് ഭാര്യ. സത്യൻ, ശശികല, സതീഷ്, പരേതനായ സന്തോഷ് എന്നിവരാണ് മക്കൾ.
