കോട്ടയം: മുതിര്ന്ന മാധ്യമപ്രവര്ത്തകനും സിനിമ നിരൂപകനും അധ്യാപകനുമായ എ സഹദേവന് അന്തരിച്ചു. കോട്ടയത്തെ സ്വകാര്യ ആശുപത്രിയില് ചികിത്സയിലിരിക്കെ ആണ് അന്ത്യം. മാതൃഭൂമി, ഇന്ത്യാവിഷന്, മനോരമ മീഡിയ സ്കൂള് എന്നിവിടങ്ങളില് പ്രവര്ത്തിച്ചു. 2016ല് ഇന്ത്യയുടെ അന്താരാഷ്ട്ര ഫിലിം ഫെസ്റ്റിവലില് അന്താരാഷ്ട്ര ഡോക്യുമെന്ററി വിഭാഗത്തില് ജൂറിയായും അദ്ദേഹം പ്രവര്ത്തിച്ചിരുന്നു
സൗത്ത് ലൈവ് ന്യൂസ് പോര്ട്ടലില് കണ്സള്ട്ടിംഗ് എഡിറ്ററായിരുന്നു. സഫാരി ടിവിയില് രണ്ടാം ലോക മഹായുദ്ധം എന്ന പരിപാടിയുടെ അവതാരകനായി.
പാലക്കാട് പുതുശ്ശേരി സ്വദേശിയാണ്. 1951 ഒക്ടോബര് 15-നായിരുന്നു ജനനം. മാത്തൂര് താഴത്തെ കളത്തില് കെ. സി. നായരുടെയും പൊല്പ്പുള്ളി ആത്തൂര് പത്മാവതി അമ്മയുടെയും മകനാണ്. പുതുശ്ശേരി പൊല്പ്പുള്ളി, ഇലപ്പുള്ള, പാലക്കാട് മോത്തിലാല് ഹൈസ്കൂള് എന്നിവിടങ്ങളിലായിരുന്നു സ്കൂള് വിദ്യാഭ്യാസം. പാലക്കാട് വിക്ടോറിയ കോളേജില് നിന്ന് ബി.എ.യും തിരുവനന്തപുരം യൂണിവേഴ്സിറ്റി കോളേജില് നിന്ന് എം.എയും പാസായി.
ഫോര്ട്ട് കൊച്ചി ഡെല്റ്റാ സ്റ്റഡി, നീലഗിരി ഗവ. ഹയര് സെക്കന്ഡറി സ്കൂള് എന്നിവിടങ്ങളില് അധ്യാപകനായിരുന്നു.
