യാത്രക്കാരുടെ ബാഗുകള്‍ മോഷ്ടിക്കുന്ന റെയില്‍വേ ജീവനക്കാരന്‍ പിടിയില്‍. കഴിഞ്ഞ ആറ് വര്‍ഷമായി ഇയാള്‍ യാത്രക്കാരില്‍ നിന്ന് ബാഗുകള്‍ മോഷ്ടിക്കുന്നുണ്ട്. റെയില്‍വേ മെക്കാനിക്ക് ജീവനക്കാരന്‍ സെന്തില്‍ കുമാറാണ് പിടിയിലായത്. മധുര റെയില്‍വേ സ്റ്റേഷനിലാണ് സംഭവം.
ഇരുന്നൂറിലധികം ബാഗുകളാണ് ഇയാളുടെ മുറിയില്‍ നിന്ന് കണ്ടെത്തിയത്. 30 പവന്‍ സ്വര്‍ണവും 30 ഫോണും 9 ലാപ്‌ടോപ്പും 2 ഐപാഡും കണ്ടെത്തി. മധുരൈ, കാരൂര്‍, വിരുദാചലം, ഈറോഡ് സ്റ്റേഷനുകളില്‍ നിന്ന് ഇയാള്‍ മോഷണം നടത്തിയിട്ടുണ്ട്.
ഡിസംബര്‍ 28 ന് വെല്ലൂരിലെ മകന്റെ വീട്ടില്‍ നിന്ന് മടങ്ങുമ്പോള്‍ മധുര റെയില്‍വേ ജംഗ്ഷനില്‍ വെച്ച് ഒരാള്‍ തന്റെ ബാഗ് മോഷ്ടിച്ചതായി ജെസു മേരി (75) എന്ന വൃദ്ധ മധുര ജിആര്‍പിക്ക് നല്‍കിയ പരാതിയെ തുടര്‍ന്നാണ് സംഭവം പുറത്തറിയുന്നത്. റെയില്‍ ഓവര്‍ ബ്രിഡ്ജിന്റെ പടികള്‍ കയറാന്‍ പാടുപെടുന്നതിനിടയില്‍ സഹായിക്കാന്‍ ഒരു മനുഷ്യന്‍ സന്നദ്ധത അറിയിച്ചിരുന്നുവെങ്കിലും പിന്നീട് ബാഗുമായി കടന്നു.
പരാതിയുടെ അടിസ്ഥാനത്തില്‍ റെയില്‍വേ പൊലീസ് സിസിടിവി ദൃശ്യങ്ങള്‍ പരിശോധിച്ചപ്പോള്‍ ബാഗുമായി ഇയാള്‍ രക്ഷപ്പെടുന്നത് കണ്ടെത്തി. റെയില്‍വേ പൊലീസ് സംഘം കേസ് അന്വേഷിച്ച് ഇറോഡ് റെയില്‍വേ സ്റ്റേഷനിലെ മെക്കാനിക്കല്‍ വിഭാഗത്തിലെ ഹെല്‍പ്പറായ ആര്‍ സെന്തില്‍കുമാറിനെ തിരിച്ചറിഞ്ഞു. എച്ച്എംഎസ് കോളനിയിലെ ഇയാളുടെ വീട്ടിലെത്തിയ സംഘം ഇയാളെ കണ്ടെത്തി. യാത്രക്കാരില്‍ നിന്ന് മോഷ്ടിച്ച എല്ലാ ബാഗുകളും സുരക്ഷിതമാക്കാന്‍ പ്രത്യേക റാക്ക് നിര്‍മ്മിച്ചതായും കണ്ടെത്തി.
ബാഗുകള്‍ പരിശോധിച്ചപ്പോള്‍ മൊബൈല്‍ ഫോണുകളും ലാപ്ടോപ്പുകളും സ്വര്‍ണാഭരണങ്ങളും മറ്റ് സാധനങ്ങളും പൊലീസ് കണ്ടെടുത്തു. ഇറോഡില്‍ താമസിച്ചിരുന്ന വീട്ടിലും സമാനമായ സംവിധാനമുണ്ടായിരുന്നു. മോഷ്ടിച്ച സാധനങ്ങളൊന്നും വിറ്റില്ലെങ്കിലും അവ ഉപയോഗിക്കുകയായിരുന്നു. ഐപാഡുകള്‍, ചാര്‍ജറുകള്‍, ഹെഡ്സെറ്റുകള്‍, പാദരക്ഷകള്‍ എന്നിവയും ഇയാളുടെ രണ്ട് വീടുകളില്‍ നിന്ന് കണ്ടെടുത്തവയില്‍ ഉള്‍പ്പെടുന്നു.
