ഗുജറാത്തിൽ വൻ വ്യാജപാൽ വേട്ട; 7,150 ലിറ്റർ മായം ചേർത്ത പാലും 120 കിലോ വെജിറ്റബിൾ നെയ്യും പിടികൂടി. ഗുജറാത്തിലെ കലാവാഡിലാണ് പൊലീസും ഭക്ഷ്യസുരക്ഷാ വകുപ്പും സംയുക്തമായി നടത്തിയ പരിശോധനയിൽ വൻതോതിൽ വ്യാജ ഡയറി ഉൽപ്പന്നങ്ങൾ പിടികൂടിയത്. 15 കിലോ പാൽപ്പൊടിയും പരിശോധനയിൽ കണ്ടെത്തി.
പിടിച്ചെടുത്ത വ്യാജ ഡയറി ഉൽപ്പന്നങ്ങൾ ഭക്ഷ്യസുരക്ഷാ വകുപ്പ് ഉദ്യോഗസ്ഥരുടെ സാന്നിധ്യത്തിൽ നശിപ്പിച്ചു. ഇതിന്റെ ദൃശ്യങ്ങളും പുറത്തുവന്നിട്ടുണ്ട്.
മായം ചേർത്ത പാൽ വിപണിയിലെത്തിയിരുന്നെങ്കിൽ ഗുരുതര ആരോഗ്യപ്രശ്നങ്ങൾക്ക് കാരണമാകുമായിരുന്നെന്ന് അധികൃതർ വ്യക്തമാക്കി. വ്യാജപാൽ എങ്ങനെയാണ് നിർമിച്ചിരുന്നത്, എത്രകാലമായി പ്രവർത്തനം തുടരുന്നു, ഉൽപ്പന്നങ്ങൾ എവിടെയൊക്കെയാണ് വിതരണം ചെയ്തിരുന്നത് തുടങ്ങിയ കാര്യങ്ങളിൽ അന്വേഷണം പുരോഗമിക്കുകയാണ്.
സംഭവവുമായി ബന്ധപ്പെട്ട് അറസ്റ്റിലായവർക്കെതിരെ ഭക്ഷ്യസുരക്ഷാ വകുപ്പ് നിയമനടപടികളും ആരംഭിച്ചു.
