ഇടുക്കി പൂപ്പാറയിൽ കാട്ടാന ആക്രമണത്തിൽ ഒരാൾക്ക് ദാരുണാന്ത്യം. പന്തടിക്കളം സ്വദേശി വിജയനാണ് മരിച്ചത്. ചക്കക്കൊമ്പൻ എന്നറിയപ്പെടുന്ന കാട്ടാനയാണ് ആക്രമിച്ചതെന്നാണ് നാട്ടുകാരുടെ ആരോപണം.
ഇന്ന് പുലർച്ചെയാണ് സംഭവം. ഇന്നലെ ജോലി കഴിഞ്ഞ് ജോലി സ്ഥലത്തെ ഷെഡിൽ ഉറങ്ങുകയായിരുന്ന വിജയൻ, ഇന്ന് രാവിലെ വീട്ടിലേക്ക് മടങ്ങുന്നതിനിടെയാണ് കാട്ടാനയുടെ ആക്രമണത്തിനിരയായത്. പ്രദേശത്ത് കാട്ടാനയുടെ സാന്നിധ്യമുണ്ടെന്നും ജാഗ്രത പാലിക്കണമെന്നും ഇന്നലെ ആർ.ആർ.ടി സംഘം മുന്നറിയിപ്പ് നൽകിയിരുന്നു.
വനംവകുപ്പ് ഉദ്യോഗസ്ഥരടക്കം സ്ഥലത്തെത്തി തുടർനടപടികൾ ആരംഭിച്ചു. മൃതദേഹം മാറ്റുന്നതിനുള്ള നടപടികളും പുരോഗമിക്കുകയാണ്. അതേസമയം, കഴിഞ്ഞ ഒരു മാസത്തിനിടെ ഈ മേഖലയിൽ മാത്രം മൂന്ന് പേർ കാട്ടാന ആക്രമണത്തിൽ മരിച്ചതായി നാട്ടുകാർ പറയുന്നു. സംഭവത്തിൽ പ്രതിഷേധവും ശക്തമാണ്.
