മുസ്ലിം ലീഗിലേക്ക് പുതിയ ആളുകളെ എടുക്കുന്നില്ലെന്ന് മുസ്ലിം ലീഗ് സംസ്ഥാന ജനറല്‍ സെക്രട്ടറി പി എം എ സലാം. ലീഗിലേക്ക് അന്‍വര്‍ വരുമോ എന്ന ചോദ്യത്തിനായിരുന്നു മറുപടി. നിലവില്‍ 25 ലക്ഷം പാര്‍ട്ടി അംഗങ്ങള്‍ ലീഗിനുണ്ട്. ആരെയും പുതുതായി എടുക്കുന്നില്ല. മതനിരപേക്ഷ ചേരിയിലേക്ക് വരുന്നുണ്ടോയെന്ന് അന്‍വര്‍ വ്യക്തമാക്കണം. അതിന് ശേഷം മുസ്ലിം ലീഗ് നിലപാട് പറയുമെന്നും പിഎംഎ സലാം പ്രതികരിച്ചു.
അന്‍വറിന് ചേലക്കരയിലെ മുസ്ലിം ലീഗ് ഓഫീസില്‍ സ്വീകരണം നല്‍കിയിട്ടില്ല. വോട്ട് ചോദിക്കാന്‍ മറ്റു രാഷ്ട്രീയ പാര്‍ട്ടികളുടെ ഓഫീസില്‍ കയറാറുണ്ട്. അതില്‍ തെറ്റില്ലെന്നും അദ്ദേഹം വ്യക്തമാക്കി.
പി പി ദിവ്യക്ക് ഉന്നത ബന്ധമമുണ്ട്. സിപിഐഎം ഓഫീസില്‍ ടിവി പ്രശാന്തനെ വിളിച്ചുവരുത്തിയാണ് വ്യാജ പരാതി തയ്യാറാക്കിയത്. ഇത് ജനങ്ങള്‍ക്ക് മനസ്സിലായിട്ടുണ്ട്. എഡിഎം നവീന്‍ ബാബുവിന്റെ കരിയര്‍ നശിപ്പിക്കാനാണ് പി പി ദിവ്യ ശ്രമിച്ചത്. ദിവ്യയും സര്‍ക്കാരും കള്ളനും പൊലീസും കളിക്കുന്നു. അതിനുള്ള ചരട് വലി മുഖ്യമന്ത്രിയുടെ ഓഫീസിലാണ് നടക്കുന്നത്. ദിവ്യയ്ക്ക് വേണ്ട സഹായം പൊലീസ് ചെയ്യുന്നുവെന്നും പിഎംഎസാലം കുറ്റപ്പെടുത്തി.
