സംസ്ഥാനത്ത് തടവുപുള്ളികളുടെ എണ്ണം വർദ്ധിച്ചുവരുന്ന സാഹചര്യത്തിൽ കേരളത്തിന് ഒരു സെൻട്രൽ ജയിൽ കൂടി ആവശ്യമുണ്ടെന്ന് ആഭ്യന്തരമന്ത്രി രമേശ് ചെന്നിത്തല. ജയിലുകളിൽ സമഗ്രമായ പരിഷ്കരണങ്ങൾ വരുത്തുന്നതിനായി സർക്കാർ നടപടികൾ ആരംഭിച്ചതായും അദ്ദേഹം വ്യക്തമാക്കി. ജയിൽ ആസ്ഥാനത്ത് കേരളത്തിലെ മൂന്ന് ജയിൽ ഡിഐജിമാരും മറ്റ് ഉന്നത ഉദ്യോഗസ്ഥരുമായി നടത്തിയ നിർണ്ണായക ചർച്ചയ്ക്ക് ശേഷം മാധ്യമങ്ങളോട് പ്രതികരിക്കുകയായിരുന്നു ആഭ്യന്തരമന്ത്രി.
തടവുപുള്ളികളെ വെറുമൊരു കുറ്റവാളിയായി കാണാതെ, അവരെ നല്ല മാർഗ്ഗത്തിലേക്ക് നയിക്കുന്ന തെറ്റുതിരുത്തൽ കേന്ദ്രങ്ങളായാണ് കേരളത്തിലെ ജയിലുകൾ നിലവിൽ പ്രവർത്തിക്കുന്നത്. എന്നാൽ ജയിലുകളിൽ തടവുകാരുടെ എണ്ണം ക്രമാതീതമായി കൂടുകയാണ്. ഈ പ്രതിസന്ധി മറികടക്കാൻ സംസ്ഥാനത്ത് പുതിയൊരു സെൻട്രൽ ജയിൽ കൂടി സ്ഥാപിക്കേണ്ടതുണ്ടെന്ന് മന്ത്രി ചൂണ്ടിക്കാട്ടി. കാലാനുസൃതമായ മാറ്റങ്ങളോടെ ആധുനികവത്കരണത്തിന്റെ പാതയിലാണ് നിലവിൽ ജയിലുകൾ മുന്നോട്ട് പോകുന്നത്. ജയിൽ അന്തേവാസികളുടെ പുനരധിവാസം, ജയിലുകളിലെ സുരക്ഷാ സംവിധാനങ്ങൾ ശക്തമാക്കൽ എന്നിവയുമായി ബന്ധപ്പെട്ട് സമഗ്രമായ പരിഷ്കരണങ്ങൾ വരുത്തുന്നതിനെക്കുറിച്ച് ഉദ്യോഗസ്ഥതല യോഗത്തിൽ വിശദമായ ചർച്ചകൾ നടന്നതായും മന്ത്രി രമേശ് ചെന്നിത്തല കൂട്ടിച്ചേർത്തു.
