തിരുവനന്തപുരം: മാര്‍ച്ചിലെ ശമ്പളം വിതരണം ചെയ്യാത്തതടക്കം വിഷയങ്ങള്‍ ഉയര്‍ത്തി കെഎസ്ആര്‍ടിസി ജീവനക്കാര്‍ 28ന് സൂചനാ പണിമുടക്ക് നടത്തും. കെഎസ്ആര്‍ടിഇഎ (സിഐടിയു)യുടെ നേതൃത്വത്തിലാണ് പണിമുടക്ക്. എല്ലാ മാസവും അഞ്ചിനുമുമ്പ് ശമ്പളം നല്‍കുമെന്ന മന്ത്രിതലത്തിലുണ്ടാക്കിയ കരാര്‍ ലംഘിച്ചെന്നും വിഷു, ഈസ്റ്റര്‍ തുടങ്ങിയ വിശേഷ ദിവസങ്ങളായിട്ടും മാര്‍ച്ചിലെ ശമ്പളം നല്‍കാത്തത് കടുത്ത അനീതിയാണെന്നും അസോസിയേഷന്‍ പ്രസിഡന്റ് ആനത്തലവട്ടം ആനന്ദന്‍ വാര്‍ത്താസമ്മേളനത്തില്‍ പറഞ്ഞു.
മാസവരുമാനം 150 കോടിയിലെത്തിയിട്ടും ശമ്പളം നല്‍കാത്തത് പ്രതിഷേധാര്‍ഹമാണ്. സര്‍വീസുകള്‍ കാര്യക്ഷമമാക്കി വരുമാനം മെച്ചപ്പെടുത്താനുള്ള നിര്‍ദേശങ്ങള്‍ മാനേജ്മെന്റ് പരിഗണിച്ചില്ല. എംപാനല്‍ ജീവനക്കാരെ സംരക്ഷിക്കുമെന്ന ഉറപ്പ് പാലിച്ചിട്ടില്ല.
കെഎസ്ആര്‍ടിസി സ്വിഫ്റ്റില്‍ എംപാനല്‍ ജീവനക്കാരെ നിയോഗിക്കുമെന്ന വാഗ്ദാനവും ലംഘിച്ചു. ഡയറക്ടര്‍ ബോര്‍ഡില്‍നിന്ന് തൊഴിലാളി പ്രതിനിധിയെ ഒഴിവാക്കിയതുള്‍പ്പെടെയുള്ള വിഷയങ്ങള്‍കൂടി ഉയര്‍ത്തിയാണ് പണിമുടക്ക്.
