സംസ്ഥാനത്തെ ബിരുദ പ്രവേശനത്തിൽ സുപ്രധാന മാറ്റം. പ്ലസ് ടു മാത്രമല്ല, ഡിപ്ലോമയും ഐടിഐ യോഗ്യതയും ഉള്ളവർക്കും ഇനി ഡിഗ്രി കോഴ്സുകളിലേക്ക് പ്രവേശനം ലഭിക്കും. ഇതുസംബന്ധിച്ച ഉത്തരവ് ഉന്നത വിദ്യാഭ്യാസ വകുപ്പ് പുറത്തിറക്കി.
ബിരുദ പ്രവേശനത്തിന് പ്ലസ് ടു നിർബന്ധമല്ലെന്ന പുതിയ ഉത്തരവാണ് ഉന്നത വിദ്യാഭ്യാസ വകുപ്പ് പുറത്തിറക്കിയത്. എൻ.സി.ആർ.എഫ് അടിസ്ഥാനമാക്കിയുള്ള പുതിയ സംവിധാനപ്രകാരം ഡിപ്ലോമയും ഐടിഐയും പാസായ വിദ്യാർഥികൾക്കും ബിരുദ പഠനത്തിന് അവസരം ലഭിക്കും.
ഐടിഐ യോഗ്യതയുള്ളവർക്ക് ബിരുദ കോഴ്സുകളുടെ ഒന്നാം വർഷത്തിലേക്ക് നേരിട്ട് പ്രവേശനം നേടാം. മൂന്ന് വർഷത്തെ പോളിടെക്നിക് ഡിപ്ലോമ പൂർത്തിയാക്കിയവർക്ക് ബിരുദ കോഴ്സുകളുടെ രണ്ടാം വർഷത്തിലേക്ക് ലാറ്ററൽ എൻട്രിയും അനുവദിക്കും.
2027-28 അധ്യയന വർഷം മുതലാണ് പുതിയ ഉത്തരവ് പ്രാബല്യത്തിൽ വരിക. വിദ്യാർഥികളുടെ അക്കാദമിക പുരോഗതിക്കും വൈദഗ്ധ്യ അധിഷ്ഠിത വിദ്യാഭ്യാസത്തിന് കൂടുതൽ അവസരങ്ങൾ ഒരുക്കുകയുമാണ് ലക്ഷ്യമെന്ന് സർക്കാർ വ്യക്തമാക്കി.
എല്ലാ സർവകലാശാലകളിലും പുതിയ സംവിധാനം നടപ്പാക്കാൻ സാങ്കേതിക വിദ്യാഭ്യാസ ഡയറക്ടർക്ക് ഉന്നത വിദ്യാഭ്യാസ വകുപ്പ് നിർദേശം നൽകിയിട്ടുണ്ട്. ഉന്നത വിദ്യാഭ്യാസ കൗൺസിലിന്റെ പ്രത്യേക സമിതിയുടെ ശുപാർശയുടെ അടിസ്ഥാനത്തിലാണ് പുതിയ തീരുമാനം.
