എച്ച്.എല്.എല് സ്വകാര്യവല്ക്കരണത്തില് നിന്ന് പിന്മാറണമെന്ന് ആവശ്യപ്പെട്ട് മുഖ്യമന്ത്രി പിണറായി
വിജയന് പ്രധാനമന്ത്രിക്ക് കത്തയച്ചു. ലേലത്തില് പങ്കെടുക്കാന് സംസ്ഥാനത്തിന് അവകാശമുണ്ട്.
സ്വകാര്യകമ്പനികള്ക്കേ കൈമാറൂ എന്ന വാശി കേന്ദ്രം ഉപേക്ഷിക്കണമെന്ന് മുഖ്യമന്ത്രി.
നിലവില് വലിയ ലാഭത്തില് പ്രവര്ത്തിക്കുന്ന എച്ച്എല്എല് സ്വകാര്യ മേഖലക്ക് മാത്രമേ വിറ്റഴിക്കുകയുള്ളൂ എന്ന കേന്ദ്ര സര്ക്കാരിന്റെ പിടിവാശി സഹകരണ ഫെഡറലിസത്തിന്റെ തത്വങ്ങളെ അപ്രസക്തമാക്കുകയാണ്. ഇത്തരം കാര്യങ്ങളില് സ്വന്തമായി തീരുമാനമെടുക്കാനുള്ള അധികാരം ഭരണഘടനാനുസൃതമായി സംസ്ഥാന സര്ക്കാരുകള്ക്കുണ്ട് എന്നത് കേന്ദ്ര സര്ക്കാര് മറക്കുകയാണ്.
പൊതുമേഖലയുടെ വികസനം മുന്നില്ക്കണ്ട് സംസ്ഥാന സര്ക്കാര് കേന്ദ്ര സര്ക്കാരിനു കൈമാറിയ ഭൂമിയിലാണ് എച്ച്എല്എല് പ്രവര്ത്തനം ആരംഭിക്കുന്നത്. അതുകൊണ്ടു തന്നെ എച്ച്എല്എല് കേന്ദ്ര സര്ക്കാറിന്റെ ഉടമസ്ഥതയില് നിന്നൊഴിവാക്കാന് തീരുമാനിച്ച സാഹചര്യത്തില് അതിനെ സംസ്ഥാന പൊതുമേഖലാ സ്ഥാപനമായി നിലനിര്ത്താനുള്ള അവകാശം കേരളത്തിനുണ്ട്. അതിനാല് എച്ച്എല്എല്-ന്റെ അധീനതയിലുള്ള ഭൂമിയും വസ്തുവകകളും കേരളത്തിനു വിട്ടു നല്കുകയോ അല്ലെങ്കില് അതിന്റെ ലേല നടപടികളില് പങ്കെടുക്കാന് അനുവദിക്കുകയോ വേണമെന്ന് മുഖ്യമന്ത്രി കത്തില് ആവശ്യപ്പെട്ടു.
