തിരുവനന്തപുരം: ഇ.പി.ജയരാജന് എല്ഡിഎഫ് കണ്വീനറാകും. ഇന്ന് ചേര്ന്ന സിപിഐഎം സംസ്ഥാന സെക്രട്ടേറിയറ്റിലാണ് തീരുമാനം. നിലവില് സിപിഐഎമ്മിന്റെ കേന്ദ്ര കമ്മിറ്റി അംഗമാണ് അദ്ദേഹം. എ.വിജയരാഘവനായിരുന്നു നിലവില് എല്ഡിഎഫ് കണ്വീനര്. എന്നാല് വിജയരാഘവന് സിപിഐഎം പിബി അംഗമായി തെരഞ്ഞെടുക്കപ്പെട്ട സാഹചര്യത്തിലാണ് മുഴുവന് സമയ എല്ഡിഎഫ് കണ്വീനര് എന്ന നിലയില് ഇ.പി.ജയരാജനെ തെരഞ്ഞെടുത്തത്. നേരത്തെ ഇ.പി.ജയരാജന്റേയും എ.കെ.ബാലന്റേയും പേരുകള് പരിഗണിക്കപ്പെട്ടിരുന്നു. നാളെ ചേരുന്ന സംസ്ഥാന സമിതിയില് ഇതുസംബന്ധിച്ച നിര്ദേശം അവതരിപ്പിക്കും. അതിനുശേഷമായിരിക്കും ഔദ്യോഗിക പ്രഖ്യാപനം ഉണ്ടാകുക.
സിപിഐഎം വിദ്യാര്ഥി സംഘടനയായ എസ്എഫ്ഐയിലൂടെയാണ് പൊതുപ്രവര്ത്തന രംഗത്തേക്കുള്ള ഇ പി ജയരാജന്റെ പ്രവേശനം. യുവജന സംഘടനയായ ഡിവൈഎഫ്ഐയുടെ പ്രഥമ അഖിലേന്ത്യാ പ്രസിഡന്റ് ആയിരുന്നു.
കര്ഷകസംഘം സംസ്ഥാന പ്രസിഡന്റ്, ദേശാഭിമാനി ജനറല് മാനേജര് എന്നീ ചുമതലകളും വഹിച്ചിട്ടുണ്ട്. 1997ലാണ് തെരഞ്ഞെടുപ്പ് രംഗത്തേക്ക് പ്രവേശിക്കുന്നത്.
97ല് അഴീക്കോട് നിന്ന് നിയമസഭയിലെത്തി. പിന്നീട് 2011ലും 2016ലും കണ്ണൂര് ജില്ലയിലെ മട്ടന്നൂരില് നിന്നും ജനപ്രതിനിധിയായി തെരഞ്ഞെടുക്കപ്പെട്ടു. 2016ല് പിണറായി വിജയന് മന്ത്രിസഭയില് വ്യവസായം, കായികം എന്നീ വകുപ്പുകള് കൈകാര്യം ചെയ്തിട്ടുണ്ട്.
