മലപ്പുറം: കൊണ്ടോട്ടിയും രാമനാട്ടുകരയും കേന്ദ്രീകരിച്ച് മയക്കുമരുന്ന് വില്‍പ്പന നടത്തി വന്നിരുന്ന സംഘത്തിലെ പ്രധാനി എം.ഡി.എം.എയുമായി പിടിയിലായി. കോഴിക്കോട് ഫറൂഖ് പെരുമുഖം സ്വദേശി ഇളയോടത്ത് പറമ്പ് വീട്ടില്‍ ഷൈന്‍ (40) ആണ് പിടിയിലായത്.
വ്യാഴാഴ്ച വൈകീട്ട് കൊണ്ടോട്ടി വൈദ്യരങ്ങാടിയില്‍ വെച്ചാണ് പ്രതിയെ പിടികൂടിയത്. അഞ്ച് ഗ്രാമോളം എം.ഡി.എം.എ ഇയാളില്‍ നിന്നും പിടികൂടി. മയക്കുമരുന്ന് കടത്തി കൊണ്ടുവരാന്‍ ഉപയോഗിച്ച സ്‌കൂട്ടറും പിടിച്ചെടുത്തിട്ടുണ്ട്. 56 ഗ്രാം എം.ഡി.എം.എയുമായി മൂന്ന് വര്‍ഷം മുന്‍പ് പരപ്പനങ്ങാടി പൊലീസ് പിടികൂടിയ സംഭവത്തില്‍ ഈയിടെയാണ് ജയിലില്‍ നിന്ന് ഇറങ്ങിയത്. തുടര്‍ന്നും മയക്കുമരുന്ന് കച്ചവടത്തില്‍ സജീവമാവുകയായിരുന്നു.
