തിരുവനന്തപുരം: ആരോഗ്യ മേഖലയ്ക്ക് ഊന്നൽ നൽകി ബജറ്റിൽ നിരവധി പ്രഖ്യാപനങ്ങളുമായി ധനമന്ത്രി വി.ഡി. സതീശൻ. തിരുവനന്തപുരത്തും ഹരിപ്പാടും പുതിയ മെഡിക്കൽ കോളേജുകൾ സ്ഥാപിക്കുന്നതടക്കമുള്ള പദ്ധതികളാണ് പ്രഖ്യാപിച്ചത്.
സംസ്ഥാനത്ത് ആരോഗ്യ സേവനങ്ങൾ കൂടുതൽ ശക്തിപ്പെടുത്തുന്നതിന്റെ ഭാഗമായി തിരുവനന്തപുരത്തും ഹരിപ്പാടും പുതിയ മെഡിക്കൽ കോളേജുകൾ സ്ഥാപിക്കുമെന്ന് ധനമന്ത്രി അറിയിച്ചു. തിരഞ്ഞെടുത്ത മെഡിക്കൽ കോളേജുകൾക്ക് സ്വയംഭരണ പദവി നൽകുമെന്നും കാസർകോട്, ഇടുക്കി, വയനാട് മെഡിക്കൽ കോളേജുകളുടെ അടിസ്ഥാന സൗകര്യങ്ങളും സേവന നിലവാരവും മെച്ചപ്പെടുത്തുമെന്നും പ്രഖ്യാപിച്ചു.
പകർച്ചവ്യാധി പ്രതിരോധ പ്രവർത്തനങ്ങൾ ശക്തിപ്പെടുത്തുന്നതിനൊപ്പം 40 വയസ്സ് കഴിഞ്ഞവർക്ക് വർഷത്തിൽ ഒരിക്കൽ ആരോഗ്യ പരിശോധന നടത്താൻ സാമ്പത്തിക സഹായം നൽകുന്ന പുതിയ പദ്ധതിയും നടപ്പിലാക്കും.
ക്യാൻസർ രോഗ പ്രതിരോധത്തിനും ചികിത്സാ സംവിധാനങ്ങൾ വിപുലീകരിക്കുന്നതിനുമായി 20 കോടി രൂപ വകയിരുത്തി. ഇൻസുലിൻ പമ്പുകളുടെ തദ്ദേശീയ നിർമ്മാണത്തിന് പിന്തുണ നൽകുമെന്നും മിഠായി പദ്ധതിയിൽ കാലോചിതമായ പരിഷ്കാരങ്ങൾ കൊണ്ടുവരുമെന്നും മന്ത്രി അറിയിച്ചു.
സ്ത്രീ സൗഹൃദ ക്യാംപസുകൾ സൃഷ്ടിക്കുന്നതിനായി എല്ലാ വിദ്യാഭ്യാസ സ്ഥാപനങ്ങളെയും ഗേൾസ് ഫ്രണ്ട്ലിയാക്കും. എല്ലാ പെൺകുട്ടികൾക്കും സാനിറ്ററി നാപ്കിൻ ലഭ്യത ഉറപ്പാക്കുമെന്നും ബജറ്റിൽ പ്രഖ്യാപിച്ചു.
സാമൂഹിക ക്ഷേമ പ്രവർത്തനങ്ങൾ ഏകോപിപ്പിക്കുന്നതിനായി ‘വൺ കേരള കരുതൽ മിഷൻ’ രൂപീകരിക്കും. സാമ്പത്തികമായി പിന്നാക്കം നിൽക്കുന്ന കുട്ടികളുടെ ചികിത്സയ്ക്ക് പ്രത്യേക പിന്തുണ നൽകുക എന്നതാണ് മിഷന്റെ പ്രധാന ലക്ഷ്യം. സമൂഹത്തിലെ ദുർബല വിഭാഗങ്ങൾക്ക് കൂടുതൽ സാമ്പത്തിക സഹായവും ഉറപ്പാക്കും.
ഇന്ദിരാ ഗ്യാരണ്ടിയുടെ ഭാഗമായി ‘ഉമ്മൻചാണ്ടി സൗജന്യ ആരോഗ്യ ഇൻഷുറൻസ് പദ്ധതി’ നടപ്പിലാക്കുമെന്നും ധനമന്ത്രി പ്രഖ്യാപിച്ചു.
പുതിയ മെഡിക്കൽ കോളേജുകൾ, ആരോഗ്യ പരിശോധനാ പദ്ധതി, ക്യാൻസർ പ്രതിരോധ പ്രവർത്തനങ്ങൾ, സൗജന്യ ആരോഗ്യ ഇൻഷുറൻസ് എന്നിവ ഉൾപ്പെടെയുള്ള പ്രഖ്യാപനങ്ങളിലൂടെ ആരോഗ്യ-സാമൂഹിക ക്ഷേമ മേഖലകളെ കൂടുതൽ ശക്തിപ്പെടുത്താനാണ് സർക്കാരിന്റെ ശ്രമം.
