കൊച്ചി കലൂരിൽ യുവതിയെ ആക്രമിച്ച് വസ്ത്രങ്ങൾ വലിച്ചുകീറി പീഡിപ്പിക്കാൻ ശ്രമിച്ച കേസിൽ 21കാരൻ അറസ്റ്റിൽ. ഇടുക്കി എലപ്പാറ സ്വദേശി അനന്തുവിനെയാണ് എറണാകുളം ടൗൺ നോർത്ത് പൊലീസ് അറസ്റ്റ് ചെയ്തത്.
ഒക്ടോബർ 14ന് വൈകിട്ട് ആറുമണിയോടെ കലൂർ ആസാദ് റോഡിലായിരുന്നു സംഭവം. നടന്നു പോവുകയായിരുന്ന യുവതിയെ പിന്തുടർന്നെത്തിയ പ്രതി ആളൊഴിഞ്ഞ ഭാഗത്ത് തടഞ്ഞുനിർത്തി ആക്രമിക്കുകയായിരുന്നു. യുവതി എതിർത്തതോടെ മുഖത്തടിക്കുകയും വസ്ത്രങ്ങൾ വലിച്ചുകീറി ഉപദ്രവിക്കുകയും ചെയ്തെന്നാണ് പരാതി. യുവതിയുടെ നിലവിളി കേട്ട് നാട്ടുകാർ ഓടിയെത്തിയതോടെ പ്രതി രക്ഷപ്പെട്ടു.
മുൻപരിചയക്കാരായിരുന്ന ഇരുവരും പിന്നീട് അകന്നതിലുള്ള വിരോധമാണ് ആക്രമണത്തിന് കാരണമെന്നാണ് പൊലീസ് നൽകുന്ന വിവരം. യുവതിയുടെ പരാതിയിൽ കേസെടുത്ത പൊലീസ് സൈബർ സെല്ലിന്റെ സഹായത്തോടെ നടത്തിയ അന്വേഷണത്തിലാണ് പ്രതിയെ കലൂരിലെ ഹോസ്റ്റലിൽനിന്ന് കസ്റ്റഡിയിലെടുത്തത്.
എറണാകുളം സെൻട്രൽ അസിസ്റ്റന്റ് പൊലീസ് കമ്മീഷണർ സിബി ടോമിന്റെ നേതൃത്വത്തിലുള്ള സംഘമാണ് അന്വേഷണം നടത്തിയത്.
