ദില്ലി: ദില്ലിയിലെ സ്വന്തം വസതിയില്‍ കിടപ്പുമുറിയില്‍ കൊല്ലപ്പെട്ട നിലയില്‍ വ്യാപാരിയെ കണ്ടെത്തി. ദില്ലിയിലെ പഞ്ച്ശീല്‍ പാര്‍ക്കിലെ മൂന്ന് നില വീട്ടിനുള്ളിലെ കിടപ്പുമുറിയിലാണ് കഴുത്തറുത്തും കുത്തേറ്റും മരിച്ച നിലയില്‍ 64കാരനായ വ്യവസായിയെ കണ്ടെത്തിയത്. തിങ്കളാഴ്ച രാവിലെ റോഹിത് അലഹ് എന്ന വ്യാപാരിയെയാണ് മരിച്ച നിലയില്‍ കണ്ടെത്തിയത്. തിങ്കളാഴ്ച പതിവ് സമയം ആയിട്ടും കിടപ്പ് മുറിയില്‍ നിന്ന് പിതാവ് പുറത്ത് വരാതിരുന്നതിന് പിന്നാലെ മുറിയിലെത്തിയ മകനാണ് 64കാരനെ മരിച്ച നിലയില്‍ കണ്ടെത്തിയത്.
മൂന്ന് നിലയുള്ള വീടിന്റെ താഴെ നില 64കാരനായിരുന്നു ഉപയോഗിച്ചിരുന്നത്. രണ്ടാം നില വ്യാപാരിയുടെ വീട്ടുകാരും മൂന്നാം നിലയില്‍ വാടകക്കാരുമാണ് തങ്ങിയിരുന്നത്. പൊലീസിനെ വീട്ടുകാര്‍ ബന്ധപ്പെടുന്നത് തിങ്കളാഴ്ച രാവിലെ 9.30ഓടെയാണ്. പൊലീസ് എത്തുമ്പോള്‍ മൃതദേഹം കിടന്നിരുന്നത് നെഞ്ചില്‍ കുത്തേറ്റ് ചോര ഒഴുകുന്ന നിലയിലായിരുന്നു. നിരവധി തവണ വയോധികന്റെ വയറിലും കുത്തേറ്റതായി പൊലീസ് കണ്ടെത്തിയിട്ടുണ്ട്.
മോഷണ ശ്രമത്തിനിടയിലുള്ള കൊലപാതകമാണെന്ന സാധ്യത പൊലീസ് ഇതിനോടകം തള്ളിയിട്ടുണ്ട്. വ്യാപാരിയുമായി ശത്രുതയില്‍ ആയിരുന്നവര്‍ക്കെതിരെയും അന്വേഷണം നടക്കുന്നതായാണ് പൊലീസ് വിശദമാക്കുന്നത്. പൊലീസ് വീട്ടിലും പരിസരത്തുമുള്ള സിസിടിവി ക്യാമറ ദൃശ്യങ്ങളും പരിശോധിക്കുന്നുണ്ട്. രണ്ട് മക്കളാണ് കൊല്ലപ്പെട്ടയാള്‍ക്കുള്ളത്.
